AQSh-ta uzaq ýaqytqa sozylǵan shatdaýn aıaqtalýǵa jaqyn: Ókilder palatasy bıýdjet týraly zań jobasyn maquldady
ASTANA. KAZINFORM — AQSh Ókilder palatasy cársenbi kúni keshkt bıýdjet týraly zań jobasyna daýys berdi, osylaısha federaldy úkimettiń jumysy rekordtyq 43 kúndik toqtaǵannan keıin qaıta bastaldy, dep habarlaıdy BBC.
Jobany Ókilder palatasynyń 222 múshesi qoldady, ony maquldaý úshin kópshiliktiń daýys berýi ǵana qajet boldy. Bıýdjet jobasy buǵan deıin AQSh Senatynda maquldanǵan bolatyn.
Palatanyń qazirgi quramnyda respýblıkashyldar 219 orynǵa, al demokrattar 214 orynǵa ıe (barlyǵy 433 oryn, onyń ekeýi qazirgi ýaqytta bos). Osylaısha, qarapaıym kópshilik 217 daýysty qurap otyr.
Alaıda, sársenbi kúni keshke palatada Kongrestiń tórt múshesi bolǵan joq: úsh respýblıkashyl jáne bir demokrat. Bul bıýdjet jobasyn qabyldaý úshin qajetti shekti 215 daýysqa deıin tómendetti, biraq ol aqyrynda artyǵymen eńserildi. Bul qujatty tek 216 respýblıkashyl ǵana emes, sonymen qatar alty demokrat qoldaǵandyqtan múmkin boldy. Bul rette Respýblıkalyq partııanyń eki múshesi jáne 207 demokrat oǵan qarsy daýys bergen.
Ókilder palatasynyń daýys berýinen keıin bıýdjetke AQSh prezıdenti Donald Tramp qol qoıýy tıis. Ol muny jaqyn arada jasaýǵa daıyn ekenin málimdedi.
Osydan keıin úkimet jumysyn qaıta bastaıdy jáne AQSh tarıhyndaǵy eń uzaq ýaqytqa sozylǵan shatdaýn aıaqtalady. Aldyńǵy rekord prezıdent Tramp tusynda ornatylǵan, biraq bul onyń birinshi merzimi kezinde boldy.
Shatdaýn aıaqtalǵan soń ne ózgeredi
Sársenbide qabyldanǵan bıýdjet zań jobasy federaldy úkimetke taǵy eki aıdan astam ýaqyt, ıaǵnı 2026 jyldyń 30 qańtaryna deıin jumys isteýge múmkindik beredi. Qabyldanǵan bıýdjet jobasy barlyq federaldy departamentter men agenttikterdiń jumysyn qaıta bastaıtynyna jáne 2026 jyldyń 30 qańtaryna deıin qarjylandyrylatynyna kepildik beredi. Bul sondaı-aq jumysty toqtatý saldarynan federaldy qyzmetkerlerdi jumystan bosatý jáne jumystan shyǵarý toqtatylatynyn bildiredi.
Demalysqa jiberilgen nemese jumystyń toqtatylýyna baılanysty jalaqysyz jumys isteýge májbúr bolǵan jumysshylarǵa (mysaly, áýe dıspetcherleri) buryn jalaqy keıinnen tólenetin.
Osy kúzde shatdaýnǵa baılanysty toqtatylǵan keıbir baǵdarlamalar, sonyń ishinde az qamtylǵan otbasylarǵa arnalǵan SNAP azyq-túlik baǵdarlamasy, kelesi qarjy jylynyń sońyna deıin nemese 2026 jyldyń qyrkúıegine deıin qabyldanǵan bıýdjet esebinen qarjylandyrylady. Eger osy ýaqyt ishinde úkimettiń jumysy taǵy toqtatylsa, bul olarǵa áser etpeıdi.
AQSh-ta uzaqqa sozylǵan shatdaýn ekonomıka men jahandyq turaqtylyqqa qalaı áser etkenin myna materıaldan oqı alasyz.