AQSh-ta úı baǵasy buryn-sońdy bolmaǵan deńgeıge kóterildi
ASTANA. KAZINFORM — AQSh-tyń Ulttyq rıeltolar qaýymdastyǵynyń málimetinshe, úı baǵasy 36 aı boıy ósip keledi, dep habarlaıdy Kazinform agenttiginiń Vashıngtondaǵy tilshisi CBS News-ke silteme jasap.
Maýsym aıynda AQSh-ta turǵyn úıdiń ortasha baǵasy 446 400 dollar bolǵan. Bul byltyrǵy osy kezeńindegi 432 700 dollarmen salystyrǵanda 3 paıyz joǵary.
AQSh-taǵy eń qymbat baspana eldiń batysynda, munda úıdiń ortasha baǵasy 633 600 dollarǵa jetken. Soltústik-shyǵysta bul kórsetkish — 564 800 dollar. Al orta batysta turǵyn úı baǵasy salystyrmaly túrde tómen — 346 600 dollar, ońtústikte 377 700 dollar shamasynda.
Qazir amerıkalyqtartyń kópshiligi úshin baspana satyp alý qoljetimsiz bolyp otyr.
LendingTree málimetinshe, AQSh-ta shamamen 200 myń dollar turatyn úıdi 10 otbasynyń tórteýinen azy ǵana satyp ala alady. Al Redfin jyljymaıtyn múlik kompanııasynyń esebine qaraǵanda, amerıkalyqtar ortasha baǵamen baspana alý úshin jylyna shamamen 117 myń dollar tabys tabýy qajet.
Buǵan deıin AQSh-ta ıpotekalyq nesıe boıynsha ortasha aılyq tólem 2 myń dollardan asqany habarlanǵan edi. Sarapshylardyń boljamynsha, 2050 jylǵa qaraı eldegi turǵyn úıdiń ortasha quny 1 mıllıon dollarǵa deıin ósýi múmkin.
