AQSh-ta úshinshi kún qatarynan myńdaǵan reıs toqtatylyp, keıinge shegerildi

ASTANA. KAZINFORM – AQSh-ta áýe qatynasyndaǵy irkilister úshinshi kún qatarynan jalǵasyp jatyr. Jeksenbi kúni el boıynsha 2,3 myńnan astam reıs toqtatylyp, taǵy 7,7 myńǵa jýyǵy keshiktirildi. Kólik mınıstri Shon Daffı dúısenbige qaraı áýe qatynasy qalypty rejımge oralady dep ýáde berdi, dep habarlaıdy Reuters.

AQSh-ta úshinshi kún qatarynan myńdaǵan reıs toqtatylyp, keıinge shegerildi
Foto: Jim Lo Scalzo/EPA

Daffıdiń aıtýynsha, áýe qatynasyndaǵy irkiliske kıbershabýyl nemese basqa da qasaqana áreket sebep bolǵanyna dálel joq. Alaıda aqaýdyń naqty sebebi ázirge anyqtalmaǵan.

AQSh Federaldyq avıatsııa basqarmasy (FAA) juma kúni el aýmaǵynda ushaqtardyń ushýyna ýaqytsha tyıym salǵan. Sonyń saldarynan reıster bes saǵatqa jýyq toqtady. Bul 2001 jylǵy 11 qyrkúıek teraktilerinen keıingi AQSh áýe qatynasyndaǵy eń uzaq jalpyulttyq úzilis boldy.

Aldyn ala málimet boıynsha, Arkanzas shtatyndaǵy El-Dorado qalasyndaǵy FAA nysanynda jańa marshrýtızator ornatylǵannan keıin aqaý týyndaǵan. Ol Tehas shtatyndaǵy Amarıllo qalasynda jaqynda aýystyrylǵan qurylǵynyń jumysyna áser etip, eldegi basqa áýe qozǵalysyn basqarý ortalyqtarynyń marshrýtızatorlaryna shamadan tys júkteme túsirgen.

FAA aqaýǵa sebep bolǵan qurylǵylardyń jumysyn toqtatqanyn jáne osyndaı 60-qa jýyq marshrýtızatordy júıeden ajyratqanyn habarlady. Degenmen tehnıkalyq qyzmet kórsetý kezinde aqaýdyń nelikten paıda bolǵany áli belgisiz.

Daffı AQSh-tyń áýe qozǵalysyn basqarý júıesi eskirgen tehnologııalar men jabdyqtarǵa, baılanys problemalaryna jáne dıspetcherler tapshylyǵyna baılanysty qıyndyqtarǵa tap bolyp otyrǵanyn aıtty. Onyń sózinshe, júıeni jańǵyrtýǵa 50 mlrd dollar qajet.

AQSh prezıdenti Donald Tramp ta Kongresti áýe qozǵalysyn basqarý júıesin jańartýǵa qosymsha qarjy bólýge shaqyrdy. Alaıda demokrat kongressmender ótken jyly osy maqsatqa bólingen 12,5 mlrd dollardyń shamamen 11 mlrd dollary áli ıgerilmegenin alǵa tartyp, jańa qarjy suraýdyń qajettigine kúmán keltirdi.

Sonymen qatar avıatsııa salasynyń sarapshylary áýe kóligi ınfraqurylymyn jańartý úshin memlekettik ınvestıtsııamen qatar jeke sektordyń da qarjysy qajet ekenin atap ótti.

Eske sala ketsek, buǵan deıin Búkil AQSh aýmaǵynda baılanys úzilip ushaqtar ushpaı qalǵan edi.