AQSh-ta úsh jýrnalıst Trampty Aq úıge kirýge tyıym salǵany úshin sotqa berdi
ASTANA. KAZINFORM — AQSh-ta CNN, MS NOW jáne Politico basylymdarynyń jýrnalısteri Donald Trampty Aq úıge kirýge tyıym salǵany úshin sotqa berdi, dep habarlaıdy DW.
Donald Tramp 19 qyrkúıekte CNN, MS NOW jáne Politico jýrnalısteriniń Aq úıge kirýine ruqsatty qaıtaryp alyp, atalǵan BAQ-tardyń jarııalanymdaryn «ádiletsiz» dep ataǵan. Úsh basylym oǵan qarsy birlesken talap-aryz túsirdi.
— Aq úı eshqandaı eskertý jasamastan bizdiń jýrnalıstik akkredıtatsııalarymyzdy qaıtaryp aldy. Buǵan olardyń bizdiń oqıǵalardy jarııalaýymyzǵa qarsylyq bildirýi sebep boldy. Eger bul sheshimge qarsylyq kórsetilmese, ol baspasóz bostandyǵyna jáne qoǵamnyń úkimet yqpalynan táýelsiz jýrnalıstıkany alý quqyǵyna qaýip tóndiredi, — delingen BAQ-tardyń birlesken talap-aryzynda.
Basylymdar Vashıngtondaǵy federaldyq sýdıaǵa jýrnalısteriniń Aq úıge kirýine qoıylǵan tyıymdy shuǵyl túrde alyp tastaý jáne zardap shekken tilshilerdiń akkredıtatsııasyn qalpyna keltirý týraly ótinish joldady.
Tramp talap-aryzǵa óziniń Truth Social áleýmettik jelisindegi jazbasy arqyly jaýap berdi.
— Aq úı erkin baspasózge shabýyl jasap jatqan joq — men ony qurmetteımin. Aq úı jalǵan jańalyqtarǵa shabýyl jasap jatyr. Olar biz jaqsy kóretin Amerıka Qurama Shtattarynda qaterli isik sekildi keń tarap ketti. Olar jemqor, áreketteri maqsatty túrde jasalady, aýqymdy ári muqııat úılestirilgen jáne olar baqylaýdan tolyq shyqty, — dep jazdy AQSh prezıdenti.
Al Fox News telearnasynyń Vashıngtondaǵy bıýro basshysy, Aq úıdegi televızııalyq pýl konsortsıýmynyń mindetin atqarýshy tóraǵasy Braıan Boýton CNN-niń pýl aıasyndaǵy mindetterin oryndaýyna Aq úıdiń múmkindik bermeýine baılanysty televızııalyq pýl Donald Tramptyń qatysýymen ótetin is-sharalardy jarııalaýdy toqtatatynyn málimdedi.
Budan buryn habarlanǵandaı, sýdıa Tramp ákimshiliginiń Garvardqa qarsy talap aryzyn qanaǵattandyrmady.
