AQSh-ta úsh aı boıy qamaýda bolǵan 13 jasar qyz qashyp shyǵyp, kómek surady
ASTANA. QazAqparat - Amerıkanyń Vıskonsın shtatynda úsh aıdan beri izdestirilip jatqan 13 jastaǵy jasóspirim tabyldy, dep habarlaıdy QazAqparat euronews.com agenttigine silteme jasap.
Djeımı Kloss ata-anasymen birge Berron qalasynda turatyn. Úsh aı buryn belgisiz bireýler otbasyna shabýyl jasap, Djeımıdiń ata-anasyn óltirip, ózin alyp ketken edi. Osy beısenbide Djeımı qaraqshylardyń buǵaýynan qashyp shyqty, dep habarlady jergilikti polıtsııa. Berron aýmaǵynyń sherıfi jasóspirimdi atyshýly qylmystyń betin ashqan naǵyz batyr dep atady.
«Qylmysker Djeımıdi úıinde qamap ustady. Soǵan qaramastan batyr qyz qashyp shyǵyp, kómek surady. Bizdiń oıymyzsha, kúdikti shabýyl jasaǵanǵa deıin bul otbasymen qarym-qatynasta bolmaǵan. Onyń jalǵyz maqsaty - Djeımıdi qolǵa túsirý bolǵan. Kúdikti shabýyldy josparlap, qolǵa túspes úshin bárin oılastyryp qoıǵan»,-deıdi sherıf.
Djeımı Kloss bergen túsinikteme nátıjesinde Gordon qalasynyń turǵyny Djeık Patterson atty azamat ustaldy. Bul qala Berronnan júzdegen shaqyrym qashyqtyqta ornalasqan.
Kloss otbasyna jasalǵan shabýyl jóninde 15 qazanda, erli-zaıyptylardyń denesi tabylǵan soń belgili boldy. Al kishkentaı Djeımıdi júzdegen erikti men polıtseıler izdep, taba almaǵan edi.
