AQSh-ta Ýsama ben Ladenniń hattary jarııalandy
ASTANA. 5 mamyr. QazAqparat - AQSh-tyń arnaýly qyzmet oryndary, kezinde №1 lańkes dep ataǵan jáne ál-Kaeda lańkestik uıymynyń kósemi bolǵan adamnyń 17 hatyn jarııalaýǵa ruqsat berdi, dep habarlaıdy «Habar» agenttigi.
Osy rette ben Ladenniń sońǵy jyldarda jazǵan hattary erekshe nazar aýdartady. Onda lańkes ál-Kaeda uıymynyń kúshi álsirep, quldyrap bara jatqanyna ókinish bildiredi. Ol sondaı-aq, ál-Kaeda men onyń sybaılas uıymdary iske asyrǵan lańkestik áreketterde qaza tapqan beıkúná musylmandardyń sany kóp bolǵanyn óz basy qoldamaıtynyn aıtqan. Ýsama ben Laden bul jerde ál-Kaedanyń Iraktaǵy tarmaǵynyń áreketterin synǵa alǵan jáne basqalardan olardyń qatelikterin qaıtalamaýdy ótingen. Ben Ladenniń aıtýynsha, basty maqsat - keıbir musylman elderinde uıymnyń bılikke jetýi emes, Batys elderine qarsy kúres bolýy tıis eken. Atyshýly lańkes ál-Kaedanyń odaqtasy sanalǵan uıymdardyń keıbirin, ásirese somalılik «ash-Shabab» uıymynyń qatygezdigin synǵa alǵan. Bul uıym adamdardyń qol-aıaǵyn shaýyp tastaý sııaqty jaza túrin qoldanady. Ýsama ben Laden osydan 1 jyl 3 kún buryn Pákistanda qaza tapqany belgili. Sol kezde onyń úıin AQSh-tyń arnaýly maqsattaǵy áskeri shabýyldaǵan bolatyn. Keıinnen úıdi muqııat tintken olar birneshe hattar men basqa da ártúrli qujattar taýyp aldy. Endi sonyń keıbiri jarııa etilip otyr.
