AQSh-ta ýly zat tasymaldaǵan poıyz apatynan soń 45 myńǵa jýyq janýar qyrylyp qalǵan

ASTANA. QazAqparat - AQSh-tyń Ogaıo shtatynda ýly zat tasymaldaıtyn poıyz apaty saldarynan 45 myńǵa jýyq janýar qyrylyp qaldy. Oqıǵa 3 aqpan kúni Shyǵys Palestına qalasyna jaqyn jerde bolǵan, dep habarlaıdy QazAqparat BBC-ge silteme jasap.

Resmı tulǵalardyń habarlaýynsha, janýarlardyń ólekseleri apat bolǵan jerden 5 mıl (8 km) radıýsta tabylǵan. Qalada apat saldaryn joıý jumystary áli de jalǵasýda. Federaldy tergeý bastaldy.

Poıyz apaty saldarynan 38 vagon relsten shyǵyp ketken, onyń 11-inde qaýipti júk bolǵan. Ogaıo Tabıǵı resýrstar departamentin (ODNR) basqaratyn Merı Merts beısenbide ótken baspasóz máslıhatynda óli tabylǵan 43 700 janýardyń barlyǵy sý túrlerine jatatynyn jáne qurlyqtaǵy janýarlardyń ólimine eshqandaı dálel joq ekenin aıtty. Ol sondaı-aq janýarlardyń eshqaısysy joıylyp ketý qaýpi tóngen túrlerge jatpaıtynyn jáne janýarlardyń úsh apta buryn poıyz apatynan keıin qyrylyp qalǵanyn jetkizdi.

Eske salsaq, AQSh-ta qaýipti zattar tıelgen poıyz relsten shyǵyp ketip, órtengeni týraly buǵan deıin habarladyq.