AQSh-ta ulttyq mereke kúni jappaı atys oqıǵalary boldy

NUR-SULTAN. QazAqparat – Demalys kúnderi AQSh-ta jappaı atystyń 14 oqıǵasy bolyp, kóptegen adam qaza tapty, dep habarlaıdy QazAqparat tilshisi amerıkalyq BAQ-tarǵa silteme jasap.

Mundaı jaǵdaılar Tehas shtatynda bolǵan qyrǵynnan keıin atys qarýyn baqylaýda ustaý týraly úndeýlerden soń oryn ala bastady.

Atap aıtqanda, 28-30 mamyr aralyǵynda AQSh-tyń 12 shtatynda amerıkalyq ulttyq mereke – Eske alý kúni kezinde bolǵan atys saldarynan 9 adam qaza taýyp, 73 adam jaraqat aldy.

NBC, USA Today jáne The Hill basylymdarynyń málimetterinshe, bul statıstıkaǵa 31 mamyrda Lýızıana shtatynda bolǵan oqıǵa da enip otyr. Onda Jańa Orlean qalasynda mektep bitirý rásiminen keıin túsiniksiz atys bastalǵan. Onda bir áıel mert bolyp, 2 er adam jaraqat aldy. Oǵan avtoturaqta turǵan eki áıel arasyndaǵy janjal sebep boldy.

2022 jyldyń basynan Amerıkanyń 34 shtatynda, sonyń ishinde Vashıngton, Kolýmbııa okrýginde jappaı atystyń 230 oqıǵasy bolǵan.