AQSh-ta Ýıtnı Hıýstonnyń týry jasandy ıntellekt kómegimen uıymdastyrylady

ASTANA. KAZINFORM — Ýıtnı Hıýstonnyń qaıtys bolǵanyna 13 jyl ótse de, onyń murasy umyt qalǵan joq. Ánshiniń muragerleri jasandy ıntellekt kómegimen onyń ańyzǵa aınalǵan daýysyn qaıta tiriltip, orkestrlik týrne uıymdastyrmaq, dep habarlaıdy AZERTADJ.

Agenttik sheteldik BAQ-tarǵa silteme jasap habarlaǵandaı, bul joba aıasynda Moises atty mýzykalyq platformanyń dybystyq jolaqtardy bólý tehnologııasy qoldanylady. Bul — jasandy ıntellekt negizinde jumys isteıtin júıe, ol án jazbasynan Ýıtnı Hıýstonnyń daýysyn bólip alyp, stýdııalyq jazbaǵa jaqyn sapadaǵy dybys alýǵa múmkindik beredi.

Jasandy ıntellekt pen mýzyka ındýstrııasynyń toǵysýy ónerpazdardyń murasy men qaıtys bolǵan ánshilerdiń quqyqtary týraly qyzý pikirtalastar týdyryp otyr. Buǵan deıin Obrı «Dreık» Grem jasandy ıntellekt kómegimen reper Týpak Shakýrdyń daýysyn qaıta jandandyrǵan bolatyn. Al The Beatles toby Djon Lennonnyń daýysyn qaıtarý úshin osyǵan uqsas tehnologııany jańa áninde qoldandy.

Ýıtnı Hıýston — búkil álemge áıgili amerıkalyq aktrısa ári ánshi. Ol 1992 jyly jaryq kórgen «Telohranıtel» fılmindegi basty róli arqyly álemge tanyldy. Bul fılmde oryndalǵan «I Will Always Love You» áni jahandyq hıtke aınaldy. Ýıtnı Hıýston 2012 jyldyń aqpanynda ómirden ozdy.

Budan buryn Japonııada jańa partııanyń jetekshisi jasandy ıntellekt bolatyny aıtyldy.