AQSh-ta týrısterge arnalǵan SpaceShipTwo ǵarysh kemesiniń ekinshi nusqasy tanystyrylady
ASTANA. QazAqparat - Brıtandyq mıllıarder Rıchard Brensonǵa tıesili amerıkanyń Virgin Galactic kompanııasy taıaý arada jetildirilgen SpaceShipTwo týrıstik ǵarysh kemesiniń modelin tanystyrady. Bul týraly jańa tehnologııa taqyrybynda jazatyn The Verge portaly habarlaıdy.
Saıttyń jazýynsha, qazirgi kemeniń syrtqy túri 2014 jyly qazan aıynda Kalıfornııa shtatynyń ońtústiginde Mohave shólinde apatqa ushyraǵan burynǵy modelge uqsamaıdy. Tergeýshiler kemeniń apatqa ushyraýyna pılottyń qateligi sebep boldy degen sheshimge kelgen. Saldarynan bir pılot qaza taýyp, ekinshisi jaraqat alǵan.
Qazirgi ǵarysh kemesi jetildirilgen, onyń kóp fýntsııalary avtomatty basqarylady. Ony synaý jyl sońynda qolǵa alynady.
SpaceShipTwo tek týrıstik maqsatta ázirlengen. Jerdi 100 km bıikten tamashalaý, salmaqsyzdyq kúıin bastan keshirý sapary eki saǵatqa sozylady, onyń quny 250 myń dollar kóleminde bolady dep kútilýde.
Onda alty jolaýshy, eki pılotqa oryn qarastyrylǵan. Ǵaryshta bolýǵa qazirdiń ózinde 800-den astam adam ótinish bergen. Olardyń qatarynda akterlar Tom Henks pen Andjelına Djolı de bar.
