AQSh-ta tuńǵysh musylman stýdentterdiń baýyrlastyǵy quryldy
ASTANA. 6 qyrkúıek. QazAQparat - AQSh-ta tarıhta alǵash ret musylman stýdentterdiń baýyrlastyǵy quryldy. Tehas ýnıversıtetiniń stýdentteri ony «Álıf Lám Mım» dep ataǵan eken.
The Independent aqparat kózi habarlaǵandaı, stýdentter baýyrlastyǵyna qatysty ádettegi uǵymdy bylaıǵy jurt erikkenniń ermegi, jelikken jastardyń kóńil kóterý ortasy, t.b. shatastyryp jatady. Tipti bul týraly Gollıvýdta talaı márte fılm de túsirilgen bolatyn.
Dese de, ústimizdegi jyldyń aqpan aıynda Tehas shtatynda osynaý jańsaq uǵymnyń tamyryna balta shabý úshin alǵashqy musylman stýdentterdiń baýyrlastyǵy quryldy. Onyń prezıdenti bolyp Áli Mahmud esimdi stýdent saılandy.
«Bizdiń kózdegenimiz - bir maqsat jolynda qatarymyzǵa musylman jastardy tartyp, baýyrymyzdaı kórý», - dedi Áli Mahmud.
Onyń aıtýynsha, atalmysh baýyrlastyq músheleri dinı qundylyqtardy qoǵamdyq ómirge etene engizý úshin belsendilik tanytady. Sondaı-aq, barlyq jat ádetterdiń aldyn-alý úshin ter tógedi.
Muslim.kz saıtynyń jazýynsha, alaıda, olardyń bul qadamyn quptamaǵan musylmandar da bar eken. Máselen, «Korneldiń ózgeshe oılaıtyn musylmandary» dep atalatyn uıym olardyń bul áreketin qatań synǵa aldy.
