AQSh-ta týǵan balalarǵa azamattyq berý: sot Tramp jarlyǵynyń kúshin joıdy
ASTANA. KAZINFORM – AQSh federaldyq soty Prezıdent Donald Tramptyń el aýmaǵynda dúnıege kelgen balalarǵa avtomatty túrde azamattyq berý quqyǵyn shekteıtin jańa jarlyǵynyń kúshine enýin ýaqytsha toqtatty, dep habarlaıdy Reuters.
Merılend shtatynyń federaldyq sýdıasy Debora Bordman mundaı sheshimdi ımmıgranttardyń quqyqtaryn qorǵaýshy uıymdardyń ótinishi boıynsha qabyldady. Buǵan deıin AQSh Joǵarǵy soty Tramptyń 2025 jylǵy osyndaı jarlyǵyn Konstıtýtsııanyń 14-túzetýine qaıshy dep tanyǵan edi.
Osy sheshimnen keıin Tramp 6 tamyzda jańa jarlyqqa qol qoıdy. Ol eń aldymen balasyna AQSh azamattyǵyn alý maqsatynda elge bosaný úshin keletin sheteldikterge baǵyttalǵan. Sondaı-aq keıbir basqa sanattaǵy sheteldik ata-analardyń balalaryna azamattyq berýdi shekteý kózdelgen.
Sýdıanyń pikirinshe, jańa jarlyq ujymdyq talapqa kiretin balalarǵa qatysty qoldanylǵan jaǵdaıda Konstıtýtsııaǵa qaıshy bolýy yqtımal, óıtkeni Joǵarǵy sot olardyń AQSh-ta týǵan sátten bastap azamat ekenin buǵan deıin anyqtaǵan.
Sot sheshimi Memlekettik departamentke, Іshki qaýipsizdik mınıstrligine jáne Áleýmettik qamsyzdandyrý basqarmasyna osy sanattaǵy balalardyń azamattyǵyn moıyndaýdan bas tartýǵa tyıym salady.
AQSh Ádilet mınıstrligi jańa jarlyqtyń burynǵysyna qaraǵanda aıasy tar ekenin aıtyp, sotqa júginýge áli erte degen ýáj keltirgen. Alaıda sýdıa jarlyqtyń oryndalýyn qazirden toqtatý qajet dep sheshti.
Eske sala ketsek, buǵan deıin de AQSh Joǵarǵy soty týý arqyly azamattyq alý quqyǵyn kúshinde qaldyrǵanyn jazdyq.
Al Tramp AQSh-ta týý arqyly azamattyq alý quqyǵyn joıǵysy keletinin málimdedi.
