AQSh-ta týǵan balaǵa birden azamattyq berýdi doǵarý máselesi qaralyp jatyr
ASTANA. KAZINFORM — AQSh Joǵarǵy soty sol elde ómirge kelgenderge azamattyq berý quqyǵyna qatysty isti qaraýdy bastady. Bul týraly NBC News telearnasyna siltemeı jasa otyryp, BELTA jazdy.
Buǵan deıin, 2025 jyldyń qańtarynda AQSh prezıdenti Donald Tramp elde zańsyz nemese ýaqytsha júrgen adamdardan týǵan balalarǵa avtomatty túrde azamattyq berýdi toqtatatyn jarlyqqa qol qoıǵan edi. Bul sheshim Tramptyń qatań ımmıgratsııalyq saıasaty aıasynda qabyldanǵan.
Tramp sot otyrysyna ózi qatysyp, AQSh tarıhynda Joǵarǵy sottaǵy aýyzsha tyńdaýǵa qatysqan alǵashqy qyzmettegi prezıdent atandy.
Bul sharaǵa qarsy tarap jarlyq AQSh Konstıtýtsııasyna engizilgen 14-túzetýdiń dástúrli túsindirmesine qaıshy keledi dep sanaıdy. Atalǵan túzetýde: «AQSh-ta týǵan nemese azamattyq alǵan jáne onyń quzyretine baǵynatyn barlyq tulǵalar AQSh azamaty bolyp sanalady» dep kórsetilgen.
Eger bul jospar júzege assa, jyl saıyn AQSh-ta dúnıege keletin myńdaǵan balaǵa áser etýi múmkin.
Joǵarǵy sot Tramptyń AQSh-ta týǵan balaǵa azamattyq berýdi shekteýge baǵyttalǵan jarlyǵy Konstıtýtsııaǵa sáıkes kele me, joq pa – osy máselege túpkilikti sheshim shyǵarýy tıis. CNN málimetinshe, sot sheshimi maýsym aıynyń sońyna qaraı jarııalanady dep kútiledi.
Eske sala keteıik, buǵan deıin Tramp AQSh-ta dúnıege kelgenderge azamattyq berýdi toqtatýǵa nıetti ekenin jazdyq.
