AQSh-ta transgenderlerdiń áıelder sportyna qatysýyna tyıym salatyn zań jobasy qabyldandy

ASTANA. KAZINFORM – AQSh Kongresiniń Ókilder palatasy transgenderlerdiń mektepterde qyzdar sportyna qatysýyna tyıym salatyn zań jobasyn maquldady, dep jazady Anadoly.

Endi eldegi barlyq transgender sportshylar bastaýysh mektepten ýnıversıtet deńgeıine deıingi áıelder sportyna qatysa almaıdy. Zań jobasy 218 qoldaý jáne 206 qarsy daýyspen qabyldandy.

Daýys berý aldyndaǵy pikirtalastarda respýblıkashylar erkek bolyp týylǵan transgender áıelder sportyna qatysýy – basqa áıel sportshylarǵa ádiletsizdik dep sanaıtynyn aıtqan. Al demokrattar bul zań jobasyn qatysýshylardy kemsitýshilik dep atady.

Bir qyzyǵy, zań jobasyn Tehastyń eki demokraty – Genrı Kýelıar men Vısente Gonsales qoldady. Eger zań jobasy Senatta qabyldansa, transgenderlerge áıelder jarysynda qatysýǵa múmkindik beretin mektepter federaldy bilim berýdi qarjylandyrýdan aıyrylady.

Er adam jynysyn aýystyrǵannan keıin áıelder arasyndaǵy sporttyq jarystarǵa qatysýy búkil elde daý týdyrdy. Respýblıkashyldar ótken jyly ózderiniń naýqandarynda bul máseleni kóterip, osy taqyryptaǵy jarnamaǵa keminde 111 mıllıon dollar jumsaǵan.

AQSh-tyń jańadan saılanǵan prezıdenti Donald Tramp ta saılaýaldy naýqany kezinde Kongress bul taqyrypqa qatysty zańnamany qabyldamasa, ol óziniń prezıdenttik ókilettikterin tyıym salý úshin paıdalanatynyn aıtqan.

Aıta keteıik, Donald Tramp prezıdenttiginiń birinshi kúninde-aq «transgenderlik essizdikti toqtatýǵa» ýáde berdi.

Sondaı-aq, Tramp AQSh armııasy qatarynan 15 myń transgender sarbazyn qýyp shyqpaq.