AQSh-ta Tramptyń sýreti bar 250 dollarlyq kýpıýra shyǵarý usynyldy

ASTANA. KAZINFORM – Ońtústik Karolınadan respýblıkashyl kongressmen Djo Ýılson AQSh prezıdenti Donald Tramptyń sýreti bar 250 dollarlyq kýpıýrany shyǵarýdy usyndy. Bul týraly Axios habarlady.

– Baıdenflıatsııa ekonomıkany joıyp, amerıkalyq otbasylardy kóbirek qolma-qol aqshamen júrýge májbúr etti, – dep túsindirdi kongressmen óz bastamasyn.

Ýılson bul banknotta Tramptyń portreti beınelenýiniń sebebi retinde «eń qymbat banknot eń qundy prezıdent úshin» degen qaǵıdany alǵa tartty.

Buǵan deıin keıbir kongresmender Donald Tramptyń týǵan kúnin ulttyq mereke dep jarııalap, oǵan úshinshi ret prezıdenttik saılaýǵa túsýge ruqsat berýdi usynǵan.

Alaıda kongressmen Ýılsonnyń usynysy zańsyz. 1866 jyly AQSh Kongresi qabyldaǵan zańǵa sáıkes, aqshalar men tıyndarǵa tiri adamdardyń sýretin salýǵa tyıym salyndy. Biraq Tramptyń jaqtastary qazir Kongresstiń eki palatasynda da kópshilikke ıe, bul ereje teorııalyq turǵydan joıylýy da múmkin degendi bildiredi.

Aıta keteıik, qazirgi ýaqytta AQSh-ta qoldanylyp júrgen eń úlken kýpıýra 100 dollar. Elde buryn 10 000 jáne 100 000 dollarlyq banknottar shyǵarylǵan. Olar qazir is júzinde joıyldy, biraq bankaralyq operatsııalar úshin nemese ınkassatsııa maqsatynda saqtalady.

Aıta keteıik, AQSh kongresmeni Dalles áýejaıynyń ataýyn Tramptyń atymen ataýdy usynǵan bolatyn.