AQSh-ta Tramptyń qoly qoıylǵan jańa 100 dollarlyq banknot pen estelik moneta tanystyryldy
ASTANA. KAZINFORM – AQSh Qarjy mınıstrligi prezıdent Donald Tramptyń qoly qoıylǵan jańa 100 dollarlyq banknotty jáne onyń beınesi beınelengen estelik bir dollarlyq monetany tanystyrdy. Bul shyǵarylym AQSh-tyń 250 jyldyǵyna oraı ázirlendi, dep habarlaıdy Kazinform agenttiginiń Vashıngtondaǵy menshikti tilshisi Breitbart basylymyna silteme jasap.
Jańa qaǵaz aqshada Donald Tramptyń qoly Qarjy mınıstri Skott Bessenttiń qolymen qatar ornalastyrylady.
Mınıstrdiń aıtýynsha, bul – qoldanystaǵy amerıkalyq qaǵaz aqshada qyzmettegi prezıdenttiń qoly qoıylyp otyrǵan alǵash jaǵdaı.
Skott Bessenttiń málimdeýinshe, AQSh zańnamasy aınalymdaǵy aqshada kózi tiri adamnyń beınesin paıdalanýǵa tyıym salady. Alaıda bul talap estelik monetalarǵa qoldanylmaıdy. Sondyqtan Tramptyń beınesi bar bir dollarlyq moneta tek kollektsııalyq maqsatta shyǵarylyp, kúndelikti aınalymǵa jiberilmeıdi.
Mınıstr jańa banknottardyń dızaınyn ózgertý salyq tóleýshilerge qosymsha shyǵyn ákelmeıtinin aıtty.
Onyń pikirinshe, prezıdenttiń qoly qoıylǵan banknottar kollektsıonerler arasynda suranysqa ıe bolýy múmkin.
Jańa 100 dollarlyq banknottar 2026 jyldyń kúzinde aınalymǵa shyǵarylady dep josparlanyp otyr. Sonymen qatar Qarjy mınıstrligi Tramptyń beınesi salynǵan 250 dollarlyq banknottyń úlgisi ázirlengenin rastady. Alaıda ony shyǵarý úshin Kongrestiń jeke maquldaýy qajet.
2005 jyly qabyldanǵan bir dollarlyq prezıdenttik monetalar týraly zańǵa sáıkes, prezıdenttiń beınesi bar aınalymdaǵy moneta onyń qaıtys bolǵanyna keminde eki jyl ótkennen keıin ǵana shyǵarylýy múmkin.
Osyǵan deıin AQSh-ta Tramp beınelengen 250 dollarlyq kýpıýra shyǵarylýy múmkin ekeni týraly jazdyq.
