AQSh-ta Tramp beınelengen 250 dollarlyq kýpıýra shyǵarylýy múmkin
ASTANA. KAZINFORM – AQSh Qarjy mınıstrligi eldiń qazirgi prezıdenti Donald Tramp beınelengen 250 dollarlyq jańa banknotany shyǵarýǵa daıyndalyp jatyr.
NBC News málimetinshe, bastama júzege asýy úshin aldymen Kongress tiri adamdardyń beınesin banknotalarǵa ornalastyrýǵa ruqsat beretin zań jobasyn maquldaýy qajet.
AQSh Qarjy mınıstri Skott Bessent vedomstvonyń mundaı banknotalardy basyp shyǵarýǵa daıyn ekenin málimdedi.
– AQSh táýelsizdiginiń 250 jyldyǵyna arnalǵan banknotada el prezıdentiniń beınelenýinen eshqandaı oǵashtyq kórip turǵan joqpyn, – dedi Skott Bessent.
Buǵan deıin AQSh Qarjy mınıstrligi qaǵaz aqshada Donald Tramptyń qoltańbasy ornalastyrylatynyn habarlaǵan bolatyn.
Vedomstvonyń málimetinshe, bul sheshim AQSh táýelsizdiginiń 250 jyldyǵyna oraı qabyldanǵan.
Sondaı-aq buǵan deıin AQSh-tyń Beıneleý óneri jónindegi komıssııa eldiń 250 jyldyǵyna arnap Donald Tramptyń beınesi qashalǵan 24 karattyq estelik altyn monetany shyǵarý týraly usynysty qoldaǵany habarlanǵan.
Alaıda atalǵan dızaın da ázirge Qarjy mınıstrliginiń túpkilikti maquldaýyn alǵan joq.
Aıta keteıik, Senat Tramptyń Aq úıdegi bal zalyna qarjy bólý týraly zań jobasyn qabyldamady.
