AQSh-ta tótenshe jaǵdaı rejımi taǵy bir jylǵa uzartyldy
ASTANA. Qyrkúıektiń 11-i. QazAqparat - AQSh Prezıdenti Barak Obama eldegi tótenshe jaǵdaı rejımin taǵy bir jylǵa uzartty, dep habarlaıdy Associated Press agenttigi. AQSh-tyń Federaldyq tizilimine joldanǵan qujattarda málim etilgendeı, AQSh-qa qarsy baǵyttalǵan lańkestik qaterdiń burynǵysynsha saqtalýyna baılanysty, tótenshe jaǵdaılar rejımin uzartý qajettiligi de týyndap otyr.
AQSh-ta tótenshe jaǵdaı 2001 jyly qyrkúıektiń 11-indegi lańkestik oqıǵalardan birneshe kúnnen keıin engizilgen bolatyn. Tótenshe jaǵdaı rejımi memleket basshysyna, qajet bolǵan jaǵdaıda ol paıdalana alatyn birqatar qosymsha ókilettikter beredi.
Búgin AQSh-ta 2001 jylǵy qyrkúıektiń 11-indegi lańkestik oqıǵalardyń qurbandaryn eske alý rásimderi ótedi.
