AQSh-ta tornadodan qaza tapqandar sany 26 adamǵa jetti

ASTANA. QazAqparat – AQSh-tyń ońtústigi men ortalyq batysyndaǵy aýdandarynda bolǵan tornadodan 26 adam qaza tapty. Birneshe shtatta úıler qırap, myńdaǵan adam jaryqsyz qaldy, dep habarlaıdy QazAqparat VVS-ge silteme jasap.

Washington Post basylymynyń málimetinshe, 60 tornado týraly habarlama tirkelgen. ABC News jazýynsha, tabıǵı apattan toǵyz shtat zardap shekti.

Arkanzas, Tennessı, Illınoıs, Indıana, Alabama men Mıssısıpıde qaza tapqan adamdar týraly belgili boldy.

Tornado Arkanzastegi Ýınn qalasymen ótken. Jergilikti turǵyn Eshlı Makmıllan joldasymen, balalarymen jáne ıtimen birge kishkentaı jýynatyn bólmede tyǵylyp otyrǵan. Tornado júrip ótkende olar bir-birimen qoshtasyp, ólemiz dep oılaǵan. Qulaǵan aǵash úılerin zaqymdaǵan, biraq ózderi zardap shekken joq.

Aldyn ala málimet boıynsha, Arkanzasta kem degende bes adam, onyń tórteýi – Ýınnde jáne bireýi Lıtl-Rokta qaza tapqan.

Taǵy jeti adam Tennesıde, tórteýi Illınoısta jáne úsheýi Indıanada qaza tapty. Alabama men Mıssısıpıdegi qurbandar týraly da habarlandy.

Arkanzas gýbernatory Sara Sanders shtatta tótenshe jaǵdaı jarııalady, qalpyna keltirý jumystaryna ulttyq gvardııa tartyldy.

Buǵan deıin Arkanzas shtatynda bolǵan eki tornadodan 600 adam zardap shekkeni jáne 18 adam qaza tapqany habarlanǵan bolatyn.