AQSh-ta tornadodan bes adam qaza tapty

ASTANA. KAZINFORM - AQSh-tyń ortalyq shtattarynda bolǵan ondaǵan tornado saldarynan kem degende bes adam qaza boldy, onyń ishinde tórt aılyq náreste bar, dep habarlaıdy VVS.

Juma kúni bastalǵan tornadodan on myńdaǵan turǵyn elektr qýatynsyz qaldy.

On shaqty okrýgte tótenshe jaǵdaı jarııalandy, Oklahoma shtatynda tórt adam qaza tapty.

Aıova shtatynda besinshi adam alǵan jaraqattarynan qaıtys boldy, dep habarlady jergilikti BAQ.

AQSh Ulttyq aýa raıy qyzmetiniń aldyn ala málimeti boıynsha, senbi kúni keıbir tornadolardyń ekpini 218 km/saǵ jetken.

Ásirese Oklahomanyń shyǵysynda ornalasqan Salfer qalasy qatty zardap shekti. Oqıǵadan keıingi vıdeoda qıraǵan úıler men aýdarylǵan kólikter kórsetilgen. Málimetterge sáıkes, 100-ge jýyq adam jaraqat alǵan.

Shtat gýbernatory Kevın Stıtt Salferge baryp, mundaı apat bılikte qyzmet etken alty jyl ishinde bolmaǵanyn aıtty.

«Qalanyń qalaı qıraǵanyn elestete de almaısyz. Qala ortalyǵyndaǵy barlyq bıznes joıylǵan sııaqty», - dedi ol.

Aq úı AQSh prezıdenti Djo Baıdenniń Kevın Stıttpen sóıleskenin jáne federaldy úkimettiń tolyq qoldaýyn usynǵanyn aıtty.