AQSh-ta tanker men krýız kemesi soqtyǵysyp, 20 adam zardap shekti
ASTANA. KAZINFORM — AQSh-tyń Lýızıana shtatyndaǵy Jańa Orlean porty mańynda tanker men ózende qatynaıtyn krýız kemesi soqtyǵysty. Oqıǵa saldarynan 20 adam zardap shekti, dep habarlaıdy Report.
Krýız kemesiniń bortynda jolaýshylar men ekıpaj múshelerin qosqanda 130-dan astam adam bolǵan.
Málimetke sáıkes, Atlantic Asphalt kompanııasyna tıesili tanker Mıssısıpı ózenindegi aılaqta jergilikti ýaqyt boıynsha 13:00–de (Astana ýaqytymen 00:00–de) American Heritage krýız kemesimen soqtyǵysqan.
Oqıǵadan keıin Jańa Orleandaǵy ýnıversıtettik medıtsınalyq ortalyq pen LCMC Health jelisine qarasty basqa da aýrýhanalarǵa zardap shekken 20 adam jetkizilgen.
Soqqydan keıin krýız kemesi bir búıirine qısaıyp, sýǵa bata bastaǵan.
Oqıǵa ornynda tıisti qyzmetterdiń mamandary jumys istep, qazir apattyń mán-jaıy anyqtalyp jatyr.
Osyǵan deıin Kıpr jaǵalaýynda keme sýǵa batyp, 10 teńizshi qutqarylǵan bolatyn.
Aıta keteıik, Kongoda eki keme soqtyǵysyp, 30 adam qaza tapty.
