AQSh-ta taǵy bir iri bank bankrotqa ushyrady

ASTANA. QazAqparat – Keıingi 2 aı ishinde AQSh-ta úshinshi bank bankrotqa ushyrady. Kalıfornııa shtatynyń bıligi First Republic bankin jaýyp, onyń akıvterin depozıtterge kepildik berý jónindegi Federaldy korporatsııanyń keńsesine ótkizdi, dep habarlaıdy QazAqparat tilshisi bloomberg.com saıtyna silteme jasap.

Endi First Republic-tiń barlyq depozıti men aktıvteri AQSh-tyń eń iri banki sanatalatyn JPMorgan-ǵa beriledi. Aıta keteıik, bankrot bolǵan banktiń aktsııalary ótken aptada 75%-ǵa deıin quldyraǵan edi. Málim bolǵandaı, oǵan First Republic-tiń «Sılıkon alqabyndaǵy» iri ıpotekalyq nesıeleri men aýqatty adamdarǵa kredıt berýdiń biregeı strategııasy sebep bolǵan.

JPMorgan banki First Republic-tiń 173 mlrd dollar nesıe, 30 mlrd dollar baǵaly qaǵaz jáne 92 mlrd dollarǵa baǵalanǵan depozıtterin ıelený úshin tender utyp aldy.

8 shtattaǵy First Republic bankiniń 84 keńsesi 1 mamyrdan bastap JPMorgan bólimsheleri retinde ashyldy. Osylaısha, bankrot bolǵan banktiń barlyq salymshylary JPMorgan salymshylary atandy.

Jalpy, 2022 jyldyń sońynda First Republic AQSh-taǵy eń iri 14-shi bank sanalǵan, onda 7,8 myńnan astam adam jumys istegen.

Qosa ketsek, buǵan deıin AQSh-tyń iri bankteri Silicon Valley men Silvergate Bank bankrotqa ushyrady.

Al, 2008 jylǵy daǵdarysty boljaǵan ekonomıst Nýrıel Rýbını taıaýda AQSh-taǵy júzdegen bank bankrotqa ushyraýy múmkin ekenin málim etti.