AQSh-ta taǵy bir bala qyzylshadan kóz jumdy

ASTANA. KAZINFORM — AQSh-tyń Tehas shtatynda júzdegen bala qyzylshamen aýyryp, taǵy bir búldirshin ómirden ótti. Bul týraly Lianhe Zaobao basylymy habarlady.

Basylymnyń málimetinshe, qaza tapqan qyz segiz jasta eken. Ol Tehas shtatynyń Labbok qalasyndaǵy aýrýhanada qyzylshalyq ókpe jetkiliksizdigi sebebinen kóz jumǵan. Bul sońǵy on jylda AQSh-ta qyzylshaǵa baılanysty tirkelgen ekinshi ólim.

AQSh Densaýlyq saqtaý mınıstrligi bul jaǵdaıǵa baılanysty ázirge túsinikteme bergen joq.

Degenmen, AQSh-tyń Densaýlyq saqtaý mınıstri Robert Kennedı sýyq habardy estigen boıda Tehas shtatyna jumys saparymen barǵan.

Basylym atap ótkendeı, Kennedı jergilikti ýaqyt boıynsha jeksenbi kúni búldirshinniń jerleý rásimine qatysady. Vaktsınatsııaǵa kúmánmen qaraıtyn belgili tulǵalardyń biri retinde, Kennedı aqpan aıynda qyzylsha saldarynan alǵashqy ólim tirkelgende, juqpaly aýrýlardyń taralýyn qalypty qubylys dep jaımashýaqtaǵan bolatyn.

Tehas shtatynyń Densaýlyq saqtaý qyzmeti 4 sáýirge deıin taǵy da 59 balaǵa qyzylsha shyqqanyn habarlady. Qańtar aıynyń sońynan beri Tehasta jalpy 481 jaǵdaı rastalǵan.

Qyzylsha basqa shtattarda da tirkelgen, olardyń qatarynda Nıý-Meksıko, Oklahoma jáne Kolorado bar.

Aqpan aıynda Tehasta bir bala qyzylshadan kóz jumǵan. Al naýryz aıynda Nıý-Meksıko shtatynda vaktsına almaǵan eresek adamnyń qyzylshamen aýyrǵany qaıtys bolǵannan keıin ǵana anyqtaldy. Qazirgi kúnde jergilikti sot-medıtsına qyzmeti onyń óliminiń naqty sebebin tekserip jatyr.

AQSh-tyń Aýrýlardy baqylaý jáne aldyn alý ortalyǵynyń (CDC) 3 sáýirdegi málimeti boıynsha bir aptada el boıynsha 124 jańa jaǵdaı tirkelip, qyzylshanyń jyl basynan bergi jalpy sany 607-ge jetken.

Ótken jyly AQSh-ta 285 adamǵa qyzylsha shyqqan. Resmı málimet boıynsha bıyl qyzylsha juqtyrǵan naýqastardyń 97 paıyzy vaktsına almaǵan nemese ekpe mártebesi belgisiz adamdar.

Buǵan deıin AQSh-ta tornado kezinde 7 adam qaza tapqanyn jazǵan edik.