AQSh-ta tabylǵan máıit Qazaqstan azamaty bolýy múmkin – SІM málimdemesi
ASTANA. KAZINFORM – Qazaqstan Respýblıkasynyń Syrtqy ister mınıstrligi AQSh-tyń quzyrly organdarynan denesi tabylǵan adamnyń boljam boıynsha Qazaqstan azamaty ekeni týraly aqparat alǵanyn habarlady.
Bul týraly vedomstvonyń resmı ókili Erlan Jetibaev brıfıng barysynda málim etti.
Onyń aıtýynsha, qazirgi ýaqytta amerıkalyq tarap marqumnyń jeke basyn anyqtaý jáne oqıǵanyń barlyq mán-jaıyn naqtylaý boıynsha qajetti rásimderdi júrgizip jatyr.
– Qazaqstan Respýblıkasynyń Syrtqy ister mınıstrligi AQSh-tyń quzyrly organdarynan denesi tabylǵan adamnyń boljam boıynsha Qazaqstan azamaty ekeni jóninde aqparat aldy. Qazirgi kezde AQSh tarapy tıisti tekserý jáne anyqtaý jumystaryn júrgizip jatyr. Qazaqstandyq dıplomattar AQSh-tyń quzyrly organdarymen jáne azamattyń týystarymen turaqty baılanysta. Olarǵa qajetti konsýldyq-quqyqtyq kómek kórsetilip jatyr, – dedi Erlan Jetibaev.
Sondaı-aq ol amerıkalyq taraptan resmı málimetter kelip túskende qosymsha aqparat jarııalanatynyn aıtty.
Buǵan deıin Qazaqstannyń Syrtqy ister mınıstrligi el azamatynyń AQSh-ta joǵalyp ketkeni týraly aqparatqa túsinikteme bergen edi.
