AQSh-ta sý tasqynynan qaza tapqandar sany 80-ge jetti

ASTANA. KAZINFORM - Bıliktiń sońǵy málimeti boıynsha, Tehastaǵy joıqyn sý tasqynynan kem degende 80 adam, onyń ishinde 28 bala qaza tapty, dep habarlaıdy BBC.

Tehas shtaty Kern okrýginiń sherıfi Larrı Lıta jeksenbi kúni keshke jýrnalısterge okrýgte rastalǵan ólim sany 68-ge jetkenin (40 eresek pen 28 bala) aıtty.

CNN jergilikti bılikke silteme jasaı otyryp, basqa bes okrýgte taǵy 12 adam qaza tapqanyn málimdedi.

Tehastyń birneshe okrýginde tótenshe jaǵdaı jarııalandy: kóptegen jol qırady, telefon jelileri jumys istemeıdi. Taǵy 41 adam, onyń ishinde 10 qyz iz-tússiz joǵalyp ketti.

Qaıtys bolǵan jáne iz-túzsiz joǵalǵan balalar Gýadalýpe ózeniniń jaǵasynda, Kerrvıll mańyndaǵy qyzdarǵa arnalǵan hrıstıandyq jazǵy Camp Mystic lagerinde demalyp jatqan. Olar nóserden keıin jaǵadan shyqqan.

AQSh prezıdenti Donald Tramp onyń ákimshiligi shtat bıligimen tyǵyz jumys istep jatqanyn, onyń tapsyrmasy boıynsha Tehasqa AQSh Ulttyq qaýipsizdik mınıstri Krıstı Noem barǵanyn aıtty.

Tehasta bolǵan Noem baspasóz máslıhatynda prezıdenttiń sý tasqyny kezindegi adamdardyń qazasyna «qatty eseńgirep qalǵanyn» aıtty jáne odan shtat turǵyndaryna Melanııa ekeýi qatty qaıǵyryp jatqanyn jáne izdeý jumystaryn jeńildetý úshin federaldy úkimettiń barlyq resýrsyn berýge daıyn ekenin jetkizýin surady.

Krıstın Noem Tótenshe jaǵdaılardy basqarý federaldy agenttiginiń (FEMA) «joǵary daıyndyqta» ekenin jáne qutqarý jumystaryna, sonyń ishinde kóbirek ushaqtar men tikushaqtarmen ýaqytyly jáne jedel kómek kórsetýdi jalǵastyratynyn atap ótti.

Elde Táýelsizdik kúnine arnalǵan merekelik is-shara toqtatyldy.

AQSh prezıdenti Donald Tramp Tehastaǵy oqıǵany «jan túrshigerlik» jáne «qorqynyshty» dep atady, al Aq úı shtatqa qosymsha kómek kórsetýge ýáde berdi.

Aıta keteıik, Tramp Tehasta tótenshe jaǵdaı rejımin engizdi.