AQSh-ta Starbucks jumysshylary ereýilge shyqty

ASTANA. KAZINFORM — Starbucks Workers United kásipodaǵyna kirgen myńnan astam barısta eldiń 40-tan astam qalasynda jumys oryndaryn tastap ketti. Sebebi kompanııa basshylyǵy men jumysshylar jalaqyny kóterý jáne jeńildikterdi keńeıtý máselesinde kelisimge kele almaǵan, dep habarlaıdy Al Jazeera.

Kompanııanyń málimetinshe, Starbucks jelisi AQSh pen Kanadada 18 myńnan astam orynǵa ıe.

Bul sherý tarıhtaǵy eń aýqymdy ereýil bolýy múmkin. Sıetldegi, Nıý-Iorktegi, Fıladelfııadaǵy, Dallastaǵy, Ostındegi jáne Portlendtegi kofehana jumysshylary da ereýilge qosyldy. Áleýmettik jelide kásipodaq músheleri tutynýshylardy Starbucks-tan aýlaq bolýǵa jáne jumysshylardy qoldaýǵa shaqyrdy.

Starbucks-tyń málimetinshe, qyzmetkerlerdiń ortasha jalaqysy saǵatyna 19 dollar. Aptasyna 20 saǵattan astam jumys isteıtinder úshin medıtsınalyq saqtandyrý, bala kútimi úshin aqyly demalys jáne Arızona memlekettik ýnıversıtetinen tegin onlaın oqý sııaqty jeńildikter bar. Al kásipodaq músheleri kóptegen shtattarda bastapqy jalaqy 15,25 dollardan aspaıtynyn jáne biraz barısta aptasyna 20 saǵattan az jumys isteıtinin aıtty. 

Buǵan deıin Starbucks 400-ge jýyq kofehanasyn jaýyp jatqandyǵy týraly jazǵan edik.