AQSh-ta shot ashqan qazaqstandyqtar týraly aqparat alý múmkin bolady
Atalǵan kelisimge 2017 jylǵy 11 qyrkúıekte elordada qol qoıyldy.
«Qujatqa sáıkes AQSh qarjy uıymdarymen halyqaralyq iskerlik operatsııalar júrgizetin barlyq sheteldik qarjy uıymdary AQSh salyq tóleýshileriniń shottary týraly aqparat berýge mindetti. Zań jobasy qarjy uıymdarynyń, onyń ishinde kredıttik uıymdardyń, saqtandyrý, brokerlik jáne basqa da osyǵan uqsas kompanııalardyń qyzmetterin qamtıdy. Osy rejımge qosylmaǵan jaǵdaıda, eger tólemdi alýshy AQSh-ta salyq salynatyn tulǵa bolsa jáne aýdarylǵan qarajat AQSh-taǵy ınvestıtsııalarmen baılanysty tabys bolsa, halyqaralyq bank aýdarymdary somasynyń 30% - y ustalýy múmkin. Kelisimge qosylǵan qarjy ınstıtýttary Qazaqstanda shot ashqan barlyq amerıkandyq jeke jáne zańdy tulǵalar týraly aqparatty anyqtaýǵa ári ashýǵa mindetti bolady», - dedi QR Ulttyq ekonomıka mınıstri Álibek Qýantyrov.
Onyń aıtýynsha, osyǵan uqsas, Qazaqstannyń Kelisimge qosylýy AQSh-ta shot ashqan barlyq qazaqstandyq jeke jáne zańdy tulǵalar týraly aqparat alýǵa múmkindik beredi. ıAǵnı, atalǵan másele boıynsha elder arasyndaǵy ózara is-qımyl Qazaqstannyń bıýdjetine de oń áserin tıgizedi.
Kelisimge sáıkes, Qazaqstan ortalyqtandyrylǵan aqparat jınaýdy kózdeıtin modeldi neǵurlym ońtaıly qadam retinde tańdady, óıtkeni osy modeldi iske asyrý:
- qarjy júıesin baqylaýdy saqtaýǵa;
- AQSh-tan Qazaqstannyń rezıdentteri jáne azamattary týraly tıisti aqparat alýǵa;
- Qazaqstan qarjy ınstıtýttarynyń ákimshilik shyǵyndaryn qysqartýǵa;
- Kelisimniń talaptarymen baılanysty qarjy sektory úshin táýekelderdi tómendetýge múmkindik beredi.
«Qazaqstan Respýblıkasynyń halyqaralyq sharttary týraly» Qazaqstan Respýblıkasynyń Zańyna sáıkes Kelisim ratıfıkatsııalaýǵa jatady.
