AQSh-ta shoshqanyń júregin saldyrǵan álemdegi ekinshi naýqas qaıtys boldy
AQSh-ta 58 jastaǵy Loýrens Fosett ózine ota jasalǵannan keıin alty aptadan soń kóz jumdy. Ol – shoshqa júregi salynǵan álemdegi ekinshi naýqas. Kazinform bul týraly Merılend ýnıversıtetiniń medıtsınalyq ortalyǵyna silteme jasap habarlaıdy.
«Biz júrektiń aıyqpas dertine shaldyǵyp, genetıkalyq túrlendirilgen shoshqa júregin transplantatsııalaý boıynsha álemde ekinshi ota jasalǵan 58 jastaǵy Loýrenstiń qaıtys bolǵanyn habarlaımyz. 20 qyrkúıekte ota jasatqan ol alty aptaǵa jýyq ýaqyt ómir súrdi», - delingen habarlamada.
Naýqas medıtsınalyq ortalyqqa 14 qyrkúıekte júrek jetkiliksizdigi dıagnozymen tústi. Bastapqy kezde-aq dárigerler oǵan dástúrli transplantatsııalaý ádisterimen ota jasaýǵa bolmaıtynyn moıyndaǵan. Alaıda 15 qyrkúıekte AQSh-tyń Azyq-túlik jáne dári-dármek basqarmasy naýqastyń ómirin uzartýǵa kómektesetin operatsııaǵa shuǵyl túrde ruqsat berdi.
Ýnıversıtet naýqastyń júregi transplantatsııalaýdan soń birinshi aıda óte jaqsy jumys istegenin atap ótti. Keıin ol fızıoterapııadan ótip, qaıtadan júrýdi úırenýge tyrysty. Degenmen, dárigerler sońǵy kúnderi onyń boıynan júrekti qabyldamaý belgilerin baıqap, aqyry ol qaıtys boldy.
Eske sala ketsek, búǵan deıin Merılend ýnıversıtetinde ekinshi ret adamǵa genetıkalyq túrlendirilgen shoshqa júregi salynǵany týraly jazǵan bolatynbyz.
