AQSh-ta ishki qaýipsizdik mınıstri laýazymyna Markýeın Mallın taǵaıyndaldy

ASTANA. KAZINFORM – AQSh Senaty Markýeın Mallınniń kandıdatýrasyn eldiń ishki qaýipsizdik mınıstri qyzmetine bekitti, dep habarlaıdy Kazinform agenttiginiń Vashıngtondaǵy menshikti tilshisi.

– Senattaǵy daýys berý qorytyndysy boıynsha Oklahoma shtatynan saılanǵan respýblıkashyl senator Markýeın Mallınniń kandıdatýrasyn 54 senator qoldap, 45 senator qarsy daýys bergen. Demokratııalyq partııa ókilderi Djon Fetterman men Martın Genrıh te ony qoldady, – dep jazdy NBC News.

Markýeın Mallın bul qyzmetke kúrdeli kezeńde kelip otyr. Ol ishki qaýipsizdik mınıstri qyzmetinde Krıstı Noemniń ornyna taǵaıyndaldy. Donald Tramp ony Mınneapolıste ımmıgratsııalyq zańnamany oryndaý boıynsha operatsııa kezinde eki amerıkalyqtyń qaza tabýyna baılanysty qyzmetinen bosatqan.

48 jastaǵy Mallın – buryn aralas jekpe-jek sportynda óner kórsetken. Ol Donald Tramppen restlıng jarystary kezinde tanysqan. Keıin otbasylyq santehnıkalyq jabdyqtar óndirisimen aınalysyp, kásipker retinde tanylǵan.

2012 jyly AQSh Ókilder palatasyna saılanyp, 2023 jylǵy 3 qańtarda ótken kezekten tys saılaýda Oklahoma shtatynan senator bolyp saılanǵan.

Buǵan deıin AQSh senatorlary Mınnesota shtatyndaǵy atys oqıǵasynan keıin Іshki qaýipsizdik mınıstriniń otstavkaǵa ketýin talap etkeni habarlanǵan.