AQSh-ta sheteldik stýdentter sany 15 paıyz azaıdy
ASTANA. KAZINFORM — AQSh-ta vızalyq saıasattyń ózgerýi men kolledjderde oqý aqysynyń qymbattaýy sheteldik stýdentter sanyn kúrt azaıtty. Bul jaǵdaı AQSh ekonomıkasyna eleýli qarjylyq qıyndyq ákelýi múmkin, dep habarlaıdy Kazinform agenttiginiń Vashıngtondaǵy menshikti tilshisi CNBC-ge silteme jasap.
«Halyqaralyq bilim berý ınstıtýty» (Institute of International Education) kommertsııalyq emes uıymynyń esebine súıensek, 2026 jyldyń kúzgi semestrinde AQSh-ta oqýǵa jańadan qabyldanǵan sheteldik stýdentter sany ótken oqý jylymen salystyrǵanda 15 paıyz azaıǵan. Al 2025-2026 oqý jylynda bul kórsetkish 17 paıyzdan astam tómendegen. Buǵan negizinen Úndistan men Qytaıdan keletin talapkerler sanynyń qysqarýy áser etken.
AQSh-taǵy kolledjderdiń kóbi sheteldik stýdentterdi tartýdy basty mindet sanaıdy. Alaıda esepte bul baǵytta birqatar kedergi bar ekeni de kórsetilgen. Atap aıtqanda, AQSh-taǵy oqý aqysy basqa eldermen salystyrǵanda qymbat. Sonymen qatar F-1 jáne J-1 sanatyndaǵy vızalardyń kópshiliginiń qoldanylý merzimin tórt jylmen shekteıtin jańa erejelerge qatysty belgisizdik te sheteldik stýdentterdi tartýǵa kedergi keltirip otyr.
Sheteldik stýdentterge keńes beretin ulttyq qaýymdastyqtyń (NAFSA) taldaýyna sáıkes, 2025-2026 oqý jylynda sheteldik stýdentter AQSh ekonomıkasyna 40 mlrd dollarǵa jýyq úles qosqan. Bıyl stýdentter sanynyń azaıýy AQSh ekonomıkasyna shamamen 2,4 mlrd dollar shyǵyn keltiredi dep boljanyp otyr.
Fitch Ratings halyqaralyq reıtıng agenttiginiń taldaýynda F-1 stýdenttik vızasyn alý tártibine engizilgen sońǵy ózgerister sheteldik stýdentterge edáýir táýeldi AQSh-tyń keıbir kolledjderi men ýnıversıtetteriniń qarjylyq jaǵdaıyna keri áser etýi múmkin ekeni aıtylǵan. Sheteldik stýdentter, ádette, oqý aqysyn tolyq tóleıdi nemese jergilikti stýdentterge qaraǵanda oqý ornynan az kólemde qarjylaı kómek alady. Bul ózgerister, ásirese, magıstratýra baǵdarlamalary aýqymdy jáne oqý merzimi tórt jyldan asatyn STEM baǵyttary (ǵylym, tehnologııa, ınjenerııa jáne matematıka) boıynsha mamandar daıarlaıtyn ýnıversıtetterge qıyndyq týǵyzýy múmkin. Olar stýdent qabyldaýdy jalǵastyrý úshin sheteldik talapkerlerdi tartýǵa baılanysty qosymsha shyǵyn shyǵarýǵa májbúr bolady.
Buǵan deıin AQSh-ta stýdenttik vıza sheteldikter úshin qymbattaýy múmkin ekeni habarlanǵan bolatyn.