AQSh-ta sheteldikter asyrap alǵan qazaq balalary týraly derekti fılm túsirildi
ASTANA. QazAqparat - Qazaqstan azamaty Qanat Beısekeev AQSh-ta sheteldikter asyrap alǵan qazaq balalary týraly derekti fılm túsirdi, dep xabarlaıdy QazAqparat.
Kartına aǵylshyn tilinde, orys sýbtıtrlarymen jaryqqa shyqpaq.
"AQSh-ta qazaq qyzyn keziktirip qalǵanymda fılm túsirý týraly oı keldi, sol kezde asyrandy balalar týraly alǵashqy reportaj jasadym. Biraq bul taqyrypta fılm túsirýge tájirıbem azdyq etetindigin uqtym, aǵylshyn tilin de jetik meńgermegen edim. AQSh-taǵy qazaqstandyqtar týraly derekti fılmder túsirip júrip, amerıkalyqtar asyrap alǵan qazaq balalary týraly jaqsy dúnıe túsirsem eken degen oı kele bastady", - deıdi ol.
Onyń sózinshe, atalmysh jobaǵa 5 myń AQSh dollary qajet boldy. Kraýdfandıng kompanııasy arqyly xalyq oǵan bul qarajatty 5 kúnde jınap bergen.
"Meniń shyǵarmashylyǵymmen tanys aýdıtorııam, kórermenderim meni qoldady. Alǵashqy tólemdi Álisher Elikbaev jasady, osylaısha, áleýmettik jeliniń ózge de qoldanýshylaryna qarajat jiberýlerine uıytqy boldy. Aýdarymdar 5-500 dollar aralyǵynda jasaldy. Jeltoqsanda fılmdi aıaqtaýdy josparlaǵan edim, biraq montajdaý kezinde týyndy tolyq aıaqtalmaǵanyn túsindim. Maǵan AQSh-qa qaıta ushýyma týra keldi. Bul joly jol shyǵynyn Almatydaǵy AQSh konsýldyǵy ótep berdi", - deıdi ol.
40 mınýttyq kartınaǵa barlyq balalardyń oqıǵalary engen joq."Fılm Amerıkanyń 7 shtatynda túsirildi. Oǵan 7 men 21 jas aralyǵyndaǵy 8 keıipker kirdi. Qazaqstannan asyrap alynǵan balalardyń Amerıkadaǵy ómirin áńgimeleımin. «Amerıkalyq mádenıetke qalaı beıimdeldi, Qazaqstan esterinde qaldy ma, óz Otandaryn qalaı elestetedi jáne Qazaqstandaǵy ómiri týraly ne biledi?» degen suraqtar tóńireginde suxbattar órbidi. Olardyń barlyǵy asyrandy ekendikterin biledi, tym erte jastan Amerıkaǵa ketkenmen, óz Otandary týraly azdaǵan estelikteri de bar", - dep atap ótedi rejısser.
Fılm aqpan aıynyń sońynda shyǵady. Beısekeev fılmdi bir jyl boıy, ara-tura úzilis jasap túsirip otyrǵan. Sebebi montajben negizgi jumysynan tys ýaqyttary aınalysty.
Qanat Beısekeevtiń sózine qaraǵanda, joba kommertsııalyq emes jáne jas rejısserlerdi shabyttandyrýǵa, az aqshaǵa jaqsy dúnıe túsirýge bolatynyn túsindirýge arnalǵan.
"Fılmdi jalǵyz túsirdim. Ózim rejısser, operator, mantajdaýshy, redaktor, jýrnalıs, prodıýser boldym. Árıne, maǵan postprodakshn kezinde jigitter qoldaý jasady", - deıdi jas rejısser.
"Fılm meıirimdilik, maxabbat týraly, eki túrli mádenıet qalaı janasa alatyndyǵy týraly, sebebi, biz bárimiz adambyz", - deıdi Qanat Beısekeev.
Munda amerıkalyq otbasylar Qazaqstanda bala asyrap alýǵa jarııalanǵan moratorıı týraly, memleket mundaı sheshimge ne úshin kelgendikteri jóninde oı qozǵaıdy.
"Men bul fılmdi kınoteatrlarda "aınaldyrýdy" nemese kınofestıvalge jiberýdi josparlap otyrǵanym joq. Kartına qazaqstandyqtarǵa qoljetimdi bolǵanyn qalaımyn. Oǵan adamdar óz qarajattaryn berdi ǵoı. Eń bastysy, adamdar óz aqshalarynyń nege jumsalǵanyn bilýi kerek", - deıdi rejısser.
