AQSh-ta shamamen birneshe myńǵa jýyq qazaqstandyq zańsyz júr — SІM

ASTANA. KAZINFORM — Qazaqstannyń Syrtqy ister mınıstrligi AQSh-ta zańsyz júrgen qazaqstandyqtarǵa qatysty taǵy da túsinik berdi.

— Bizdiń resmı derek boıynsha AQSh-ta 3600-ge jýyq Qazaqstan azamaty tur. Olar konsýldyqta resmı esepke turǵan, olardyń qujaty durys. Al zańsyz júrgende kelsek, logıkalyq turǵyda olardyń sanyn biz bilmeımiz, sebebi olar zańsyz júr. Shamamen 100-den birneshe myń adamǵa deıin bolýy múmkin. Deportatsııa — kez kelgen eldiń kóshi-qon qyzmetiniń zańdy ári qalypty sharasy. Eger adam kóshi-qon zańyn buzsa, ol deportatsııalaýǵa jatady, — dedi mınıstrliktiń resmı ókili Aıbek Smadııarov BAQ ókilderiniń saýalyna jaýap bere turyp. 

Sondaı-aq Syrtqy ister mınıstrliginiń resmı ókili AQSh-ta zańsyz júrgen qazaqstandyqtarǵa keńes berdi. 

— Bizdiń zańsyz barǵan azamattarǵa bir ǵana keńes, AQSh aýmaǵynan shyqqandaryńyz durys bolady. Siz eger kóshi-qon polıtsııasynyń qolyna tússeńizder, ol el aýmaǵyna kirýge tyıym salynady. Durysy Qazaqstanǵa kelip, vızaǵa nemese grın-kartaǵa zańdy túrde qujat tapsyrý qajet, — dedi ol.

Jyl basynda Donald Tramptyń mıgratsııalyq saıasaty Qazaqstanǵa qalaı áser etetini týraly jazǵan edik. 

Qańtardyń sońynda elimizdiń Syrtqy ister mınıstrligi Qazaqstan azamattaryn AQSh-tan shyǵaryp jiberý týraly aqparattyń joqtyǵyn habarlady.