AQSh-ta shamamen 15 myń medbıke ereýilge shyqty
ASTANA. KAZINFORM — AQSh-tyń Nıý-Iork qalasynda shamamen 15 myń medbıke aýrýhanalarmen jańa eńbek kelisimshartyn jasaý boıynsha kelissózderde ilgerileýdiń bolmaýyna baılanysty ereýil uıymdastyrdy, dep habarlaıdy Anadoly.
Nıý-Iork shtaty medbıkeleriniń kásipodaǵy (NYSNA) úsh iri aýrýhananyń shamamen 15 myń qyzmetkeri ereýilge qosylǵanyn habarlady. Kelissózder barysynda taraptar arasynda birqatar másele boıynsha kelispeýshilikter týyndaǵan.
Medbıkeler jergilikti ýaqytpen tańǵy 6:00-de Mount Sinai aýrýhanasynda jáne oǵan qarasty eki kampýsta, sondaı-aq NewYork-Presbyterian aýrýhanasy men Montefiore medıtsınalyq ortalyǵynda jumysyn toqtatty.
Ereýil birneshe medıtsınalyq mekemede qatar júrgizilgenimen, ár aýrýhana kásipodaqpen kelissózdi jeke-jeke júrgizip keledi. Qaladaǵy keıbir aýrýhanalar sońǵy kúnderi kelisimge kelip, ereýildiń aldyn alǵan.
Aýrýhana basshylyǵy ereýil kezinde medıtsınalyq qyzmettiń úzdiksizdigin qamtamasyz etý úshin ýaqytsha medbıkelerdi jumysqa tartatynyn málimdedi.
Qazirgi kezde tumaýdyń aýyr maýsymy jalǵasyp jatqandyqtan, ereýildiń densaýlyq saqtaý júıesiniń jumysyna keri áser etýi múmkin degen alańdaýshylyq bar. Osyǵan baılanysty keıbir naýqastar basqa aýrýhanalarǵa jiberilýi, keıbir medıtsınalyq protsedýralar keıinge qaldyrylýy nemese jedel járdem qyzmeti ózge ortalyqtarǵa baǵyttalýy múmkin.
Sondaı-aq bul jaǵdaı ereýilge qatyspaǵan qalalyq aýrýhanalarǵa da qosymsha júkteme túsirýi yqtımal.
Qaqtyǵystyń negizgi sebepteri — kadr tapshylyǵy men eńbek qaýipsizdigi
Medbıkelerdiń talaptary aýrýhanaǵa qaraı ártúrli bolǵanymen, negizgi máseleler — kadr tapshylyǵy men eńbek qaýipsizdigi. Kásipodaq ókilderi medbıkelerge shamadan tys jumys júkteletinin aıtyp, aýrýhanalarda jasandy ıntellektti qoldanýǵa shekteý qoıýdy talap etip otyr.
Sonymen qatar medbıkeler jumys oryndaryndaǵy qaýipsizdik sharalaryn kúsheıtýdi suraıdy. Al aýrýhana ákimshiligi kadr tapshylyǵyn joıý baǵytynda jumys júrgizilip jatqanyn, alaıda kásipodaq talaptarynyń tym qymbatqa túsetinin alǵa tartty.
Aıta keteıik, Nıý-Iorktegi sońǵy iri medbıkeler ereýili 2023 jyly Mount Sinai aýrýhanasy men Montefiore medıtsınalyq ortalyǵynda ótken. Úsh kúnge sozylǵan ereýil nátıjesinde úsh jyl ishinde jalaqyny 19 paıyzǵa arttyrýdy kózdeıtin kelisimge qol jetkizilgen bolatyn.
Alaıda taraptar arasynda osy kelisim aıasynda qyzmetkerler sanyn arttyrý mindettemeleriniń qanshalyqty tıimdi oryndalyp jatqany jóninde áli de pikir qaıshylyǵy bar.
Budan buryn AQSh-ta jappaı atys deregi boıynsha 24 jastaǵy kúdikti qamaýǵa alynǵanyn jazǵanbyz.