AQSh-ta seısenbige deıin 1,7 myń áýe reısi toqtatyldy
ASTANA. QazAqparat - AQSh-tyń Djordjııa, Vırdjınııa, Soltústik jáne Ońtústik Karolına shtattarynda qalyń qar men boran saldarynan jaryq sónip, reıster toqtatyldy, dep habarlaıdy QazAqparat tilshisi The Washington Post-qa silteme jasap.
Áýe jáne temirjol reısteri toqtatyldy. Aýa raıynyń qolaısyzdyǵy seısenbige deıin jalǵasady.
Jeksenbi kúni AQSh-tyń ońtústik-shyǵysynda boran soǵyp, qalyń qar jaýǵan jáne kóktaıǵaq bolǵan. Sınoptıkter qolaısyz jol-kólik jaǵdaıy, sý tasqyny men elektr energııasyndaǵy aqaýlardyń bolýy múmkin ekendigin eskertken.
Sondaı-aq, aýa raıyna baılanysty eskertý Tennesı, Kentýkkı jáne Vırdjınııada jarııalanǵan. Soltústik Karolınanyń keıbir qalalarynda jeksenbi kúni 35 sm-den astam qar jaýǵan.
Soltústik Karolına men Vırdjınııanyń gýbernatorlary tótenshe jaǵdaı jarııalaǵan jáne AQSh-ta jeksenbi kúni 1700 reıs toqtatyldy. Soltústik jáne Ońtústik Karolınada, Vırdjınııada, Tennesıde, Alabamada jáne Djordjııada jarty mıllıonǵa jýyq adam elektr energııasynan aıyryldy.
Soltústik Karolınanyń gýbernatory Roı Kýper (D) turǵyndardy jolǵa shyǵýdan bas tartýǵa shaqyrdy. Qutqarýshylar brıgadasy, sonyń ishinde Ulttyq gvardııa túni boıy jumys istep, iri tasjoldardaǵy apattardy joıýmen aınalysty.
