AQSh-ta saılaýdaǵy jeńilisten keıin Pentagon basshysyna ımpıchment jarııalanýy múmkin
ASTANA. KAZINFORM — AQSh Ókilder palatasy kelesi aptada Pentagon basshysy Pıt Hegsetke ımpıchment jarııalaýdy daýysqa salýy múmkin, dep habarlaıdy Kazinform agenttiginiń menshikti tilshisi CNN-ge silteme jasap.
Respýblıkalyq partııanyń aralyq saılaýdaǵy jeńilisinen keıin «qyzyldar» arasynda AQSh Qorǵanys mınıstrine qatysty syn kúsheıe tústi. Kóptegen respýblıkashyldar Hegset prezıdent Donald Trampty Iranmen soǵysty bastaýǵa kóndirdi, biraq onyń týyndaýy múmkin saıası saldaryn eskermedi dep sanaıdy.
Respýblıkashyldar Hegsetti AQSh-tyń áskerı múmkindikterin asyra baǵalady jáne Iran jaqyn arada tize búgetindeı belgiler baıqalmasa da, qaqtyǵystyń odan ári ýshyǵýyn qoldady dep aıyptaıdy. Soǵys uzaqqa sozylǵan qaqtyǵysqa aınaldy, ekonomıkalyq problemalar men saılaýshylardyń narazylyǵyn kúsheıtti degen pikirde.
Osyǵan baılanysty Kentýkkı shtatynan kelgen respýblıkashyl kongressmen Tomas Massı Kongress sessııaǵa oralǵannan keıin Hegsetke ımpıchment jarııalaý máselesin daýysqa salýdy usynbaq. Keıbir respýblıkashyldar mınıstr áskerı operatsııanyń merzimin, maqsattaryn jáne nátıjelerin qate baǵalaǵany úshin jaýap berýi kerek dep sanaıdy.
Tramp ázirge Hegsetti qoldap keledi, ony óz ákimshiliginiń eń jaqsy qyzmetkerleriniń biri dep atap, jumystan shyǵarylýy týraly qaýesetterdi joqqa shyǵardy.
Buǵan deıin AQSh vıtse-prezıdenti Dj.D. Vens te Respýblıkalyq partııanyń jeńilýiniń basty sebebi soǵys bolǵanyn aıtqan bolatyn.
