AQSh-ta saıabaqtaǵy atystan bir polıtseı qaza taýyp, taǵy biri jaralandy
ASTANA. KAZINFORM – AQSh-tyń Ońtústik Karolına shtatyndaǵy Kolýmbııa qalasynyń saıabaǵynda atys bolyp, bir polıtsııa qyzmetkeri qaza tapty, taǵy bir tártip saqshysy jaralandy, dep habarlaıdy Xinhua.
Kolýmbııa qalalyq polıtsııa departamentiniń basshysy Ýılıam «Skıp» Holbrýktyń málimetinshe, oqıǵa kezinde kúdikti de qaza tapqan.
Aldyn ala málimet boıynsha, polıtsııa qyzmetkerleri turmystyq janjal týraly shaqyrtý boıynsha oqıǵa ornyna barǵan.
– Bir polıtsııa qyzmetkeri qaza tapty, taǵy bir tártip saqshysy jaralandy. Kúdikti de kóz jumdy. Qazirgi ýaqytta oqıǵanyń barlyq mán-jaıy anyqtalyp jatyr. Tergeý aıaqtalǵansha turǵyndardan atalǵan aýmaqqa barmaýdy suraımyz, – dedi Ýılıam Holbrýk.
Quqyq qorǵaý organdary oqıǵa ornynda tergeý amaldaryn júrgizip jatyr. Osyǵan baılanysty jergilikti turǵyndarǵa saıabaq mańynan ýaqytsha aýlaq bolý eskertildi.
Buǵan deıin AQSh-tyń Leksıngton qalasyndaǵy saıabaqta jappaı atys bolyp, bir adam qaza tapqan edi. Taǵy tórt adam jaraqat aldy.
Aıta keteıik, keshe Shveıtsarııadaǵy tehnologııa festıvalinde atys boldy.
