AQSh-ta reıster toqtatylǵannan keıin áýe qatynasy qalpyna kele bastady

ASTANA. KAZINFORM — Juma kúni AQSh Federaldyq avıatsııa basqarmasynyń (FAA) jumysynda bolǵan aýqymdy aqaýdan keıin jeksenbi keshke qaraı eldegi áýe qatynasy birtindep qalypty rejımge orala bastady, dep habarlaıdy Kazinform agenttiginiń Vashıngtondaǵy menshikti tilshisi CBS News basylymyna silteme jasap. 

samolet SShA Amerıka avıatsııa
Foto: flight-report.com

FlightAware reısterdi baqylaý servısiniń deregine súıensek, juma kúni 9 159 reıs toqtatylyp, taǵy 7 190 reıs keshikken. Jeksenbide jaǵdaı birtindep túzelgenimen, 1 400-den astam reıs oryndalmaı, 2 200-ge jýyq reıs kesteden keshigip ushqan.

Al AQSh kólik mınıstri Shon Daffı jeksenbi kúni dúısenbige qaraı áýe qatynasy tolyq qalpyna kelýge tıis ekenin aıtty.

FAA júıesindegi aqaýǵa eskirgen ınfraqurylym sebep bolǵan. Aldyn ala málimet boıynsha, mys symdardy talshyqty-optıkalyq kabelderge aýystyrý kezinde merdiger L3Harris kompanııasy marshrýtızatordyń aqaýyn anyqtaǵan. Bul ózge qurylǵylarǵa shamadan tys júkteme túsirip, júıe jumysynyń buzylýyna ákelgen. Aqaý áýe qozǵalysyn basqarý qyzmetiniń 17 nysanyna áser etken.

Federaldyq avıatsııa basqarmasynyń basshysy Braıan Bedford symdardy aýystyrý basqarma birneshe jyldan beri josparly túrde júrgizip kele jatqan tehnıkalyq jumys ekenin aıtty. Qazir júıeniń shamamen 70 paıyzy mys symdardyń ornyna talshyqty-optıkalyq kabelderge qosylǵan.

Sondaı-aq AQSh Іshki qaýipsizdik mınıstri Markveın Mallın aqaýǵa kıbershabýyl sebep bolǵanyn rastaıtyn eshqandaı belgi joq ekenin málimdedi. Bılik ókilderiniń habarlaýynsha, áýe qozǵalysy ýaqytsha toqtatylǵan kezde aspanda bolǵan barlyq ushaq áýejaılarǵa aman-esen qonǵan.

FAA basshysy Braıan Bedford reısterdi toqtatý týraly sheshim qaýipsizdik maqsatynda qabyldanǵanyn atap ótti. Al L3Harris kompanııasy oqıǵanyń sebepterin tergeý barysynda basqarmaǵa qoldaý kórsetip jatqanyn málimdedi.

Bul jaǵdaı AQSh-tyń áýe qozǵalysyn basqarý júıesin jańartý máselesin qaıta kóterdi. Kongress bul maqsatqa 12,5 mıllıard dollar bólgen.

Sondaı-aq juma kúni keshke Tramp ákimshiligi áýe qozǵalysyn basqarý júıesin qarjylandyrýǵa suraǵan qarajat kólemin 30 mlrd dollarǵa deıin ulǵaıtty.

AQSh-tyń resmı ókilderi áýe qatynasynyń qaýipsiz ekenine sendirdi. Soǵan qaramastan, jolaýshylarǵa reısterdiń jaı-kúıin áýe kompanııalarynan aldyn ala naqtylap alý usynyldy. Delta, American Airlines jáne Southwest kompanııalary reısterdiń keshigýi men ushý kestesiniń ózgerýi jalǵasýy múmkin ekenin habarlap, bıletterdi basqa ýaqytqa qaıta brondaý múmkindigin usyndy. Bılik pen áýe tasymaldaýshylarynyń boljamynsha, aqaýdyń áseri taǵy birneshe kúnge sozylýy múmkin.

Buǵan deıin Búkil AQSh aýmaǵynda baılanys úzilip ushaqtar ushpaı qalǵany habarlanǵan bolatyn.