Referendým: AQSh-ta Qazaqstannyń 100 jastaǵy azamaty daýys berdi
ASTANA. KAZINFORM – AQSh-ta 15 naýryz kúni jańa Konstıtýtsııa boıynsha respýblıkalyq referendým bastaldy.
Referendýmda 100 jastaǵy Qazaqstan azamaty daýys berdi, dep habarlaıdy Kazinfrom-nyń Vashıngtondaǵy menshikti tilshisi.
1925 jyly týǵan Grınfeld Arnold Genrıhovıchtiń júrip-turýy qıyn bolǵan soń bıýlleten salynatyn jáshikti onyń turǵylyqty mekenjaıyna jetkizý qajet boldy.
Otandasymyzdyń Almaty konservatorııasy negizin qalaýshylardyń biri bolǵany jáne osy oqý ornynda 50 jyldan astam eńbek etkeni belgili. Shyǵarmashylyq jolynda ol kórnekti mýzykanttarmen tyǵyz jumys istedi. Olardyń qatarynda professor Evgenıı Brýsılovskıı men professor Iosıf Dýbovskıı bar. Onyń ustazdyq sheberligi bir býyn kompozıtorlardyń qalyptasýyna yqpal etti.
Bıyl Arnold Genrıhovıch Kats halyqaralyq jas pıanıster baıqaýyna keńesshi ári qazylar alqasynyń múshesi retinde shaqyrylǵany belgili boldy. Baıqaý laýreattarynyń kontserti dástúrli túrde Carnegie Hall sahnasynda ótedi.
Qazir AQSh aýmaǵynda referendýmǵa daýys berý úshin úsh ýchaske jumys istep tur. Olar jergilikti ýaqyt boıynsha tańǵy 07:00-den keshki 20:00-ge deıin Qazaqstannyń dıplomatııalyq ókildikteri janynda ashyq bolady.
Alǵash bolyp №413 ýchaske Vashıngton qalasyndaǵy Qazaqstan Elshiliginde jáne №414 ýchaske Nıý-Iork qalasyndaǵy Qazaqstannyń Bas konsýldyǵynda ashyldy. Keıin AQSh astanasymen úsh saǵattyq ýaqyt aıyrmashylyǵyna baılanysty №472 ýchaske San-Frantsısko qalasyndaǵy Qazaqstannyń Bas konsýldyǵynda jumysyn bastady.
Vashıngton qalasyndaǵy Qazaqstan Elshiligi janyndaǵy alǵashqy ýchaskede AQSh-tyń ońtústik jáne ońtústik-shyǵys shtattarynda turatyn qazaqstandyqtar daýys bere alady.
Nıý-Iorktegi Qazaqstannyń Bas konsýldyǵy janyndaǵy ekinshi ýchaske soltústik jáne soltústik-shyǵys shtattardaǵy azamattardyń daýys berýin uıymdastyrady.
Al San-Frantsıskodaǵy Qazaqstan Bas konsýldyǵy janyndaǵy úshinshi ýchaske AQSh-tyń batys shtattaryn qamtyp, el aýmaǵyndaǵy daýys berý úderisin qorytyndylaıdy.
Al elimizde búgin 116 jastaǵy keıýana referendýmda daýys berdi.