AQSh-ta poıyzdar soqtyǵysty: 2 adam qaza taýyp, 116-sy zardap shekti
ASTANA. QazAqparat - AQSh-tyń Ońtústik Karolına shtatynda asa iri temirjol apaty boldy, dep habarlaıdy ABC News.
Shtat gýbernatory Genrı Makmasterdiń aıtýynsha, Amtrak kompanııasyna qarasty jolaýshylar poıyzy men júk tasıtyn temirjol quramy soqtyǵysqan. Saldarynan 2 adam qaza taýyp, taǵy 116 adam túrli jaraqattarmen aýrýhanaǵa jetkizildi.
Qaıǵyly oqıǵadan el prezıdenti Donald Tramp habardar etilip, ol ýaqyt saıyn jańalanǵan aqparat alyp otyr. Tramp Tvıtterdegi óz paraqshasynda apattan qaza tapqandardyń týystary men jaqyndaryna kóńil aıtty.
Málimetterge qaraǵanda, jolaýshylar poıyzynda 139 adam bolǵan, onyń 8-i - ekıpaj músheleri. Soqtyǵysý saldarynan poıyzdyń birneshe vagony relsten shyǵyp ketken.
Buǵan deıin zardap shekken 70 adam týraly habarlanǵan bolatyn.
