AQSh-ta pnevmonııalyq obadan adam ólimi tirkeldi

ASTANA. KAZINFORM – Arızona dárigerleri pnevmonııalyq obadan naýqastyń ólimin tirkedi. Bul týraly Kokonıno okrýginiń densaýlyq saqtaý qyzmeti habarlady, dep habarlaıdy Kazinform TASS-qa silteme jasap.

– Kokonıno okrýginiń densaýlyq saqtaý jáne halyqqa qyzmet kórsetý bóliminiń sheneýnikteri nátıjelerdi 2025 jyldyń 11 shildesinde aldy jáne okrýg turǵynynyń Yersinia pestis bakterııasy týdyratyn aýyr ókpe ınfektsııasy pnevmonııalyq obadan qaıtys bolǵanyn rastady, - dep jazylǵan Kokonıno okrýginiń densaýlyq saqtaý qyzmetiniń Facebook-tegi paraqshasynda. 

Bul 2007 jyldan beri aýdanda atalmysh dertten qaıtys bolǵan alǵashqy jaǵdaı ekeni atap ótildi. Marqumnyń jeke basy týraly aqparat jarııalanbady. 

Pnevmonııalyq oba – aýrýdyń eń aýyr jáne eń az taralǵan túri jáne tynys alý júıesin qamtıdy.

Buǵan deıin AQSh-ta qyzylsha juqtyrý deregi sońǵy 33 jyldaǵy eń joǵary deńgeıge jetkenin jazǵan edik.