AQSh-ta órt kezinde bolǵan atystan eki órt sóndirýshi qaza tapty

ASTANA. KAZINFORM – AQSh-tyń Aıdaho shtatynda órtti sóndirý kezinde belgisiz bireý órt sóndirýshilerge oq atyp, eki qyzmetker qaza tapty, taǵy biri jaralandy. Shabýyl uıymdastyrǵan adam oqıǵa ornynda kóz jumdy, dep habarlaıdy Anadolu.

Órt Aıdahodaǵy Ker-d’Alen qalasynyń janyndaǵy Kenfıld taýy aýmaǵynda ornalasqan tabıǵı saıabaqta belgisiz sebeppen tutanǵan. Jalyn 25  ormandy jerge, sonyń ishinde jaıaý jáne velosıped joldaryna taraǵan.

Oqıǵa ornyna órt sóndirýshiler jumyldyrylǵan. Órtti sóndirý barysynda belgisiz adam olarǵa oq jaýdyrǵan. Oqıǵa ornyna jergilikti polıtsııa kelgen.

Aıdaho shtatynyń gýbernatory Bred Lıttl qaza tapqandardy «erlikpen qaza tapqan órt sóndirýshiler» dep atap, jergilikti turǵyndardy oqıǵa bolǵan aýmaqtan aýlaq bolýǵa shaqyrdy.

Keıinirek AQSh-tyń ishki qaýipsizdik jónindegi mınıstri Krıstı Noem oqıǵa ornynda quqyq qorǵaý organdarynyń qyzmetkerleri de oq astynda qalǵanyn habarlady. Aımaqqa FBI men arnaıy maqsattaǵy SWAT jasaǵynyń qosymsha bólimsheleri jiberilgen.

Kýteneı okrýginiń sherıfi Robert Norrıs málimdegendeı, operatsııa aıaqtalǵan soń taýly aýmaqtan qarýly er adamnyń máıiti tabylǵan.

Aldyn ala derekter boıynsha, eki órt sóndirýshi qaza taýyp, bireýi jaralanǵan. ABC News telearnasynyń habarlaýynsha, tergeý barysynda ádeıi órt qoıý nusqasy da qarastyrylyp jatyr.

Aıta keteıik, buǵan deıin Izmır áýejaıy orman órtine baılanysty jumysyn ýaqytsha toqtatqanyn jazdyq.