AQSh-ta órt kezinde bes bala qaza tapty
NUR-SULTAN. QazAqparat – Pensılvanııa shtatyndaǵy Erı qalasynda shyqqan órtten bes bala mert boldy, dep habarlaıdy CBC News polıtsııaǵa silteme jasap.
Órt balalar kúndiz baratyn ortalyqta bolǵan.
Harris Family Day Care jeke ortalyǵyndaǵy órt týraly habar jeksenbi kúni túnde jergilikti ýaqytpen saǵat 1:12-de túsken. Órt sóndirýshiler tórt mınýttyń ishinde kelgen, bul ýaqytta órt ǵımaratty tolyqtaı sharpyp úlgergen.
Órt sóndirýshiler ǵımarattyń ıesi Eleın Herrısti ajaldan aman alyp qaldy. Ol aýrýhanaǵa jetkizildi. Sondaı-aq, 12 jáne 17 jastaǵy eki jasóspirim qutqaryldy. Olar janyp jatqan ǵımarattyń shatyryna shyǵyp, jerge sekirgen. Budan bólek, órtten kórshi úıdiń ıesi zardap shekken.
Qaza tapqan balalardyń esimderi men jastary ázirge habarlanǵan joq. Órttiń neden shyqqany anyqtalyp jatyr.
