AQSh-ta OpenAI men seriktesteri bes derekter ortalyǵyn turǵyzady
ASTANA. KAZINFORM – OpenAI, Oracle jáne japondyq SoftBank korporatsııasy birlesip, AQSh-ta bes jańa derekter ortalyǵyn salýdy kózdep otyr. Bul joba el tarıhyndaǵy, jasandy ıntellekt salasyndaǵy eń iri bastama bolmaq, dep habarlaıdy Reuters.
Jańa ortalyqtar Stargate baǵdarlamasy aıasynda Tehas shtatynda (Shakelford jáne Mılem okrýgteri), Nıý-Meksıkoda (Dona-Ana okrýgi), Ogaıo shtatynda (Lordstaýn qalasy), sondaı-aq Orta Batys shtattarynyń birinde salynady. Sońǵysynyń naqty ornalasqan jeri ázirge jarııalanbady.
Jalpy ınvestıtsııalar kólemi 500 mıllıard dollardy quraıtyn Stargate jobasy úsh jyl ishinde derekter ortalyqtarynyń qýatyn 7 gıgavatqa deıin jetkizýdi kózdeıdi. Aldaǵy ýaqytta bul kórsetkishti 10 gıgavatqa deıin ulǵaıtý josparlanǵan.
OpenAI basshysy Sem Altmannyń aıtýynsha, jasandy ıntellekt óziniń áleýetin tek jetkilikti esepteý qýaty bolǵan jaǵdaıda ǵana júzege asyra alady. Kompanııa ókilderi jańa data-ortalyqtardyń qurylys alańdary men qyzmet kórsetý salalarynda shamamen 25 myń jumys orny ashylatynyn atap ótti.
Sarapshylar Stargate-ti «ınfraqurylymdyq joba bolashaǵy» dep ataýda. Jobaǵa álemdik IT ındýstrııasynyń jetekshi oıynshylary qatysyp, qarjylandyrýdy jeke qarajat esebinen de, qaryz kapıtalyn tartý arqyly da júzege asyrmaq.
Sonymen birge OpenAI-diń seriktesteri Microsoft, Nvidia jáne CoreWeave óz ınvestıtsııalaryn arttyryp, arnaıy chıpterdi jetkizýdi jáne ChatGPT pen Copilot sekildi generatıvti servıster ekojúıesin damytýdy jalǵastyrýda.
Bul bastama AQSh-tyń joǵarǵy deńgeıde qoldaýyna ıe boldy. Qańtar aıynda prezıdent Donald Tramp iri IT-kompanııalardyń basshylarymen kezdesip, jasandy ıntellektti damytýdyń el ekonomıkasy men ulttyq qaýipsizdigi úshin strategııalyq mańyzyn atap ótti.
Buǵan deıin Oracle OpenAI-men jalpy quny 300 mlrd dollarǵa deıingi esepteý qýatyn bes jyl ishinde jetkizý týraly kelisimge qol qoıǵan. Bul kelisim bultty servıster tarıhyndaǵy eń iri kontrakt bolyp sanalady. Al Nvidia jańa júıelerdi engizý barysynda OpenAI-ge 100 mlrd dollarǵa deıin ınvestıtsııa salýdy josparlap otyr.
OpenAI jýyrda ChatGPT paıdalanýshylarynyń jasyn tekserý júıesin engizetinin jarııalaǵan bolatyn. Bul shara kámeletke tolmaǵandardy qorǵaýǵa baǵyttalǵan.