AQSh-ta on jyldan beri komada jatqan áıel bosandy
ASTANA. QazAqparat - AQSh-ta on jyl komada jatqan áıel bosandy. Sábıdiń ákesi aýrýhana qyzmetkeri bolýy múmkin, dep habarlaıdy VVS.
AQSh-tyń Arızona shtatynda on jyldan astam ýaqyt boıy komada jatqan áıel bala tapty. Polıtsııa zorlaý deregi boıynsha tergeý amaldaryn bastap ketti. Tártip saqshylary aýrýhana qyzmetkerleriniń DNQ úlgilerin tekserip jatyr.
Oqys oqıǵa Fınıks qalasynyń mańyndaǵy Hacienda emhanada bolǵan. Aýrýhanada on jyldan beri komada jatqan áıel 29 jeltoqsan kúni bala tapty. Bala týa salysymen tynys almaǵan, biraq qazir aman-esen, dárigerler onyń densaýlyǵyn qadaǵalap otyr.
CBS telearnasynyń habarlaýynsha, aýrýhana qyzmetkerleri komada jatqan áıeldiń qalaı júkti bolyp qalǵanyn bile almaı del-sal bolyp otyr. Dárigerlerdiń sózine qaraǵanda, naýqas áıelge turaqty túrde kútim jasalýy qajet ekendikten kóptegen qyzmetkerler onyń palatasyna kirýge quqyly bolǵan.
Naýqas áıeldiń otbasynyń múddesin qorǵap otyrǵan advokat Djon Maıklstyń aıtýynsha, onyń týystary bul keleńsiz jaǵdaıdan áli es jııa almaı otyr.
Ázirge áıeldiń aty-jóni qupııa saqtalýda. Bir belgilisi, ol sýǵa batyp ketkennen keıin komaǵa túsken.
Arızona shtatynyń densaýlyq saqtaý departamenti aýrýhanadaǵy qaýipsizdik sharalaryn kúsheıtý tapsyrylǵanyn málimdedi. Atap aıtqanda, endi emhanadaǵy er adamdar naýqas áıelderdiń palatasyna tek áıel qyzmetkerlermen birge kiretin bolady.
