AQSh-ta ómir boıy túrmege otyrýǵa jaza kesilgen qazaqstandyq taǵy da sot aldyna bardy
ASTANA. QazAqparat - AQSh-ta ómir boıy túrmede otyrýǵa jazaǵa kesilgen Ásel Ábdiǵapparova taǵy da sot aldyna bardy. Eger jaǵdaı sátti aıaqtalsa, otandasymyzdyń túrmede otyrý merzimi qysqarýy múmkin, dep habarlady «Ekspress-K» gazeti.
Eske sala keteıik, bul qaıǵyly oqıǵa 2001 jyly bastaldy. Ásel AQSh-qa jaqsy bilim alýǵa úmittenip, ushyp kelgen bolatyn. Shtattarda ol tártipti stýdent bolyp ómir keship jatty - San-Antonıo ýnıversıtetiniń magıstratýrasynda oqýmen qatar, ofıtsıant bolyp qyzmet jasap, qosymsha nápaqa taýyp júrdi. Biraq onyń Ramon Ernandespen kóńil jarastyrýy ómiriniń astań-kesteńin shyǵardy.
«Birde ol óziniń súıiktisimen jáne onyń dosymen okrýgte mashınamen qydyryp júrdi. Kenetten Ramon avtobýs aıaldamasynan jalǵyz turǵan áıeldi - 37 jastaǵy Roza Rosadony kórip qaldy. Budan ári oqıǵa qatigez trıllerdegideı órbidi. Jigitter áıeldi salonǵa kúshtep otyrǵyzyp, skotchpen baılady, qonaqúıge aparyp tonady jáne zorlady, odan keıin ólgenshe sabady. Jańaǵy áıeldiń eki balasy úshin aıaýshylyq etý jónindegi ótinishine de qulaq aspady. Ólgen áıeldiń múrdesin qaskúnemder kómip tastady», - dep egjeı-tegjeıli baıandaıdy basylym.
Osy qandy oqıǵanyń eriksiz qatysýshysy bolǵan Ásel shydaı almaı, birneshe kúnnen keıin barlyǵyn polıtsııaǵa habarlady. Bul sheshimge kelý oǵan da ońaıǵa soqqan joq, óıtkeni ol Ramonnan sábıge aıaǵy aýyr edi. Ásel quqyq saqshylaryna Roza Rosado kómilgen jerdi kórsetti, sol jerde onyń qolyna kisen salyndy. Ramon Ernandes pen onyń sybaılasy Santos Mınhares te tutqyndaldy. Onyń alǵashqysy 2012 jyly óltirildi. Ekinshisi ólim jazasyna deıin jete almaıts ajal qushty. Al Ásel túrmede ul bala bosandy, biraq ta ol osy kezge deıin ulyn kóre alǵan joq.
Ótken aptada qazaqstandyq taǵy da sot zalynda boldy. Amerıkandyq baspasózdiń habarlaýynsha, bul aty-shýly is qaıta qaralmaq jáne osy joly oǵan qatysty aıyptaýlar jumsartylmaq. Ol kóp degende 28 jylǵa bas bostandyǵynan aıyrylýy múmkin. Budan buryn apellıatsııalyq sot isti alǵash qaraǵan sýdıa Áseldiń ózin qorǵaýy úshin múmkindik bermegenin, sondaı-aq tergeýge kómekteskeni eskerilmegendigin atap kórsetken bolatyn.
