AQSh-ta ómir boıy túrmede otyrý jazasyna kesilgenderdi qatelesip bosatyp jibergen
ASTANA. 20 qazan. QazAqparat - AQSh bıligi Florıda shtatynyń túrmesinde ómir boıy qamaýda otyrý jazasyna kesilgen eki qylmyskerge izdeý saldy. Atap aıtqanda kisi óltirgenderi úshin aıypty dep tanylǵan osy eki azamat jalǵan qujattar arqyly túzetý mekemesinen bosap shyqqan kórinedi.
Assoshıeıted Press agenttiginiń habarlaýynsha, Djozef Djenkıns pen Charlz Ýokerdi quqyq qorǵaý organdary Penhendl túrmesinen qatelesip bosatyp jibergen. Jazalardy oryndaý departamentine kelip túsken qujattarda atalǵan eki adam asa aýyr qylmys jasamaǵandary týraly, sondaı-aq olardyń qamaýda otyrý merzimi 15 jylǵa deıin qysqartylǵandyǵy jazylǵan.
Osy qujattardyń negizinde Djenkıns - 27 qyrkúıekte, al Ýoker - 8 qazanda bosatylǵan eken.
Ázirge osy jalǵan qujattardy daıarlaǵan adam belgisiz. Bostandyqqa shyqqan eki qylmyskerge qatysty prokýror men sýdıanyń qoltańbalary jalǵan ekeni anyqtaldy, ıaǵnı olardyń qolyn syrttaı uqsatyp jasaǵan. Al sottalǵandardyń qujattaǵy saýsaq izderi shynaıy bolyp shyqty.
Qazirgi kezde atalǵan fakti boıynsha tergeý amaldary júrip jatyr.
