AQSh-ta óltirilgen qazaqstandyq jetkinshekter 13 jyl buryn Şýche qalasynan asyrap alynǵan

QR Bilim jáne ǵylym mınıstrliginiń habarlaýyna qaraǵanda, Koktıev Tımýr Danııaruly 1997 jyly, al Ábdirahmanov Damır Dýlatuly 1999 jyly týǵan(asyrap alynǵannan keıin olarǵa - Karlson Torı (Tımýr) jáne Karlson Kýınn (Damır) degen esimder berilgen). Olar Aqmola oblysy Kókshetaý qalasynda týǵan jáne Şýche qalasyndaǵy balalar úıiniń tárbıelenýshileri bolatyn. Aqmola oblysy Shortandy aýdandyq sotynyń T.D.Koktıev pen D.D. Ábdirahmanovty asyrap alýǵa berý týraly sheshimi 2002 jyldyń shildesinde zańdy kúshine engen. Asyrap alynǵan ýaqytynda Tımýr 5, al Damır 3 jasta bolatyn.

Asyrap alýshylar - Karlson Terrı Ýılıam 1957 jyly týǵan jáne Karlson Lana Djeın 1966 jyly týǵan, AQSh azamattary, asyrap alý kezinde Vashıngton shtatynyń Sıetl qalasynda turǵan.

«QR Bilim jáne ǵylym mınıstrligi oqıǵa barysyn jiti baqylaıtyn bolady jáne QR Syrtqy ister mınıstrligimen birlese úılestirilgen jumystar atqarady. Budan bólek, mınıstrlik AQSh azamattary asyrap alǵan qazaqstandyq balalardyń qaıǵyly oqıǵa saldarynan qazaǵa ushyraýyna baılanysty kóńil aıtady» delingen baspasóz baıanynda.

Eske sala keteıik, ótken juma kúni Vashıngton shtatynyń turǵyny Devıd Kempbell óziniń áıeli Lana Karlson (49 jasta) men asyrap alǵan eki balasy Kýın Karlson (16 jasta) jáne Torı Karlsondy (18 jasta) atyp óltirgen bolatyn. Keıin ol óz-ózine qol jumsaǵan. Kóz jumǵan taǵy bir qyzdyń esimi ázirge atalmady. Kórshileri olardyń orys tilinde sóıleskenderin aıtqandyqtan, jetkinshekterdi Reseıden asyrap alǵan degen boljam aıtylǵan bolatyn.