AQSh-ta ólim jazasynan aman qalǵan áıel qaıtadan túrmege jetkizildi
ASTANA. KAZINFORM – AQSh-ta ólim jazasyna kesilgen 50 jastaǵy Krısta Paık ólimge ákeletin ınektsııadan aman qalyp, aýrýhanadan shyǵaryldy. Ol qaıtadan túrmege jetkizildi, dep habarlaıdy BBC.
Advokattarynyń málimetinshe, Krısta Paık qyrkúıek aıynyń sońynda júzege aspaı qalǵan ólim jazasynan keıin aýrýhanada em qabyldaǵan. Qazir onyń jaǵdaıy turaqtanyp, sońǵy 30 jylyn ótkizgen túrmesine qaıtaryldy.
30 qyrkúıekte Paıkke ólim jazasyn oryndaý úshin pentobarbıtal preparaty eki ret engizilgen. Alaıda ol tiri qalyp, aýyr jaǵdaıda aýrýhanaǵa jetkizilgen.
Osy aptanyń basynda áıel esin jıyp, sóıleı bastaǵan. Bul jaǵdaı medıtsına qyzmetkerlerin, sarapshylar men advokattaryn tańǵaldyrǵan.
Qorǵaýshylarynyń aıtýynsha, esin jıǵan kezde onyń alǵashqy sózderi «Men qaıdamyn?» jáne «Siz kimsiz?» degen suraqtar bolǵan.
– Ol osyndaı tótenshe jaǵdaıda ózine qamqorlyq kórsetken shuǵyl qyzmet mamandary men medıtsına qyzmetkerlerine alǵysyn bildiredi, – delingen advokattarynyń málimdemesinde.
Krısta Paıktiń oqıǵasy buryn-sońdy bolmaǵan jaǵdaı retinde baǵalanyp otyr. Qolda bar málimetterge sáıkes, ol ólimge ákeletin ınektsııa arqyly jazalaý áreketinen aman qalǵan jalǵyz belgili adam sanalady.
Sársenbi kúni ótken sot otyrysynda Tennessı shtaty bas prokýrorynyń kómekshisi Ýıll Eıers Krısta Paıkke qatysty ólim jazasynyń jańa kúni belgilenetini ázirge belgisiz ekenin málimdedi.
Sonymen qatar sýdıa Tennessı shtatynyń bıligine júzege aspaı qalǵan ólim jazasyna qatysty barlyq dáleldemeni saqtaýdy mindettedi. Bul materıaldar aldaǵy ýaqytta shtatqa qarsy sot isin qozǵaýǵa negiz bolýy múmkin.
Krısta Paık 18 jasynda aýyr qylmys jasaǵany úshin sottalǵan. Ol sol kezdegi jigiti Tadarıl Shıppen birge 19 jastaǵy Kollın Slemmerdi uryp-soǵyp, azaptap óltirgen.
Olar turmysy tómen otbasylardan shyqqan jastarǵa arnalǵan oqý ortalyǵynda tanysqan.
Aıta keteıik, buǵan deıin AQSh prezıdenti Donald Tramp sońǵy 60 jylda alǵash ret áskerı qyzmetkerge qatysty ólim jazasyn oryndaýdy maquldaǵan bolatyn.
