AQSh-ta oqytylatyn serjanttar quramynyń sany 50 paıyzǵa ulǵaıtyldy - QR QM

ASTANA. QazAqparat - QR Qorǵanys mınıstrliginiń Kadet korpýsy bazasynda QR QK-niń joǵary serjanttar quramynyń AQSh QK (ARCENT) Ortalyq qolbasshylyǵynyń komandalyq serjant-maıory Ronnı Kellımen, sondaı-aq onyń izbasary serjant-maıor Djeıms Boýdekkermen kezdesýi ótti.

 Bul týraly QR QM baspasóz qyzmeti habarlady

«Búgingi tańda serjanttar quramynyń bilim berý júıesi sátti túrde iske qosyldy. Jaýyngerlik jáne dene daıarlyǵy nusqaýshylary tárizdi serjanttarǵa da jeke quramdy jeke oqytý jáne tárbıe berýdiń barlyq úderisi júktelgen.  QR QK-niń serjanttar quramyn AQSh-ta oqytý úshin kýrstyń tizbesi men sany shamamen 50 paıyzǵa ulǵaıtyldy. Ótken jazda biz alǵash ret birlesip Kadet korpýsynda nusqaýshy serjanttardy daıarlaý jónindegi pılottyq kýrsty ótkizdik. Atalmysh kýrsta 36 serjant oqytyldy. Aldaǵy jazda biz óz kúshimizben balamaly kýrsty ótkizýdi josparlap otyrmyz», - dedi sheber-serjant Temirbek Halyqov.  

2014 jyldan bastap halyqaralyq yntymaqtastyq tapsyrmalarynyń túrleri ulǵaıǵany baıqalady. Sonymen, AQSh QK ÁÁK, ÁTK, ÁShQQ jáne áskerı polıtsııasy serjanttar quramynyń qyzmetin zerdeleý, áskerı qyzmettiń qaýipsizdigin, jaýyngerlik daıarlyq boıynsha nusqaýshy serjanttardyń daıarlyǵyn  uıymdastyrý, biliktilikti arttyrý júıesin jańǵyrtý jóninde ekijaqty is-sharalar uıymdastyryldy.

Sondaı-aq kezdesýde eki eldiń áskerı qyzmetshileri ótken jyldardaǵy ekijaqty áskerı yntymaqtastyq turǵysyndaǵy jetistikter men eki eldiń serjanttar júıesin damytý máselelerindegi ári qaraıǵy ózara is-qımyl perspektıvalaryn talqylady.