AQSh-ta oqyp júrgen qazaq jastary BUU Qaýipsizdik keńesine qatysty

NЬıÝ-IORK. QazAqparat - Qazaqstan Prezıdenti Nursultan Nazarbaev tóraǵalyq etken Qaýipsizdik Keńesiniń tarıhı otyrysyna «Bolashaq» baǵdarlamasy boıynsha AQSh-ta oqyp jatqan 30-ǵa jýyq qazaqstandyq stýdent qatysty, dep habarlaıdy «QazAqparat» HAA tilshisi.

Nıý-Iork, Boston, Fıladelfııa men AQSh-tyń basqa da qalarynan kelgen qazaqstandyq jastar oqý kesteleri boıynsha jospar quryp, BUU-nyń akkredetatsııasynan ótken. Osylaısha, stýdentter 18 qańtar kúni «Jappaı qyryp-joıatyn qarýdy taratpaý: senim sharalary» otyrysynyń qatysýshysy boldy.

Ońtústik Kalıfornııa (AQSh-tyń batys jaǵalaýyndaǵy Los-Anjeles qalasy) ýnıversıtetiniń 2- kýrsynyń magıstranty Muǵzar Sanatuly tarıhı oqıǵanyń kýágeri bolý úshin 4 myń shaqyrymdyq qashyqtyqtaǵy qaladan arnaıy kelgen.

«Bolashaq stýdentterine BUU QK-niń taqyryptyq debatyna qatysý boıynsha biregeı múmkindik týdy. Men mundaı dárejedegi otyrysqa birinshi ret qatysyp otyrmyn. Qaýipsizdik keńesine múshe elderdiń árbir ókili Qazaqstan týraly jyly sóılep, meniń elimdi pragmatıkalyq jáne beıbitshilikke den qoıǵan memleket dep atady. Osyndaı otyrysty tikeleı kórý erekshe sezimdi uıalatady. Bul sharada búkil ǵalamdaǵy antııadrolyq qozǵalysqa Qazaqstan óziniń úlesin qosa bildi dep esepteımin», - deıdi ol «QazAqparat» HAA tilshisine.

Eske sala ketsek, BUU Qaýipsizdik keńesinde otyrystyń «Jappaı qyryp-joıatyn qarýdy taratpaý: senim sharalary» atty taqyrybyn Qazaqstan usynǵan bolatyn. Bul usynysty keńestiń barlyq músheleri qoldaǵan. Debat barysynda jappaı qyryp-joıýǵa arnalǵan qarýlardy taratpaý joldary talqylandy. Otyrysqa Polsha Prezıdenti Andjeı Dýda, BUU Bas hatshysy Antonıý Gýtterısh, RF Syrtqy ister mınıstri Sergeı Lavrov jáne ózgeler qatysty.